E compania farmaceutico, Moderna, su testnan haci riba un posibel vacuna contra COVID-19 a duna resultado basta positivo. Moderna a partner cu e National Institutes of Health pa desaroya un vacuna contra e virus.
Moderna a duna e vacuna na participantenan di su estudio, y den 8 di nan a logra haya e anticurpanan contra e virus. E anticurpanan tawata di un cantidad hopi mas halto cu for di personanan cu a naturalmente recupera for di e virus. E anticurpanan desaroya ta neutralisa y pega na e virus, asina strobando esaki di ataca e celnan humano.
Dr. Tal Zaks, hefe di e compania Moderna, a splica cu si e estudio sigui bon, pa Januari 2021 lo e compania tin un vacuna disponibel. Zaks a continua na bisa “esaki ta noticia absolutamente bon y noticia cu nos tawata sperando pa algun tempo caba.”
E prome fase di e test, a wordo haci riba un grupo chikito, tawata focus riba e safety di e vacuna y tawata purba stimula un reaccion inmunologico. Mester nota cu e resultado di e estudio conduci pa e National Institutes of Health ainda no a wordo controla pa coleganan experto den e area medico.
Moderna, cual su headquarters ta basa na Massachusetts, ta un di e 8 desaroyadornan mundial cu ta haciendo test di vacunacion riba hende. Merca su Food and Drug Administration (FDA), e instancia encarga cu control y inspeccion di siguridad di cuminda y remedi, no ta sigur so e vacuna lo ta funcional den bida real.
Pero mirando e resultado positivo di e prome fase, nan a duna permiso pa Moderna continua cu e siguiente fase di test. Esaki lo consisti di e vacunacion di miles di participante.