Un di e condicionnan cu Hulanda a impone ta pa AZV reduci 5 miyon florin pa luna entrante 1 di juni. Esey kiermen 35 miyon den e ultimo 7 lunanan di 2020. Ta importante pa pone e cifra aki den perspectiva di e gastonan annual di AZV. No ta conoci ainda cuanto e gastonan anual lo ta pa 2019, pero por spera cu esaki lo ta mas halto cu e 428 miyon florin di 2018. Si nos sali for di e cifra di 2018, reducion di 35 miyon nifica cu lo mester baha gastonan cu 8% pa 2020, mientras cu a premira gastonan adicional door di incorpora e cuido di radioterapia na ImSan y Respaldo cu a introduci cuido di nos Grandinan y por ultimo cubri aumento di cuido na hospital cu un aumento barbaro di e huur di e edificio di HOH. Esaki No ta wega y gobierno POREDmep sin mas a bay di acuerdo cu e condicionnan impono dor di Hulanda.
No ta conoci con AZV y gobierno lo bay saca nan som, pero awor mas cu nunca ta haci dolor cu e proyecto di ImSan original a wordo para pa capricho politico. Ta conoci cu ImSan tabata tin e intencion pa dedica atencion na prevencion y introduccion di turismo medico. Ambos aspecto cu no a haya mucho atencion prome. Prevencion a bira necesario ora cu un estudio cu minister Posner a laga ehecuta a mustra riba cifranan devastador di nos estado di salud, na unda a sali na cla cu nos problema di salud mas grandi ta riba tereno cardio-vascular a consequencia di “SOBREPESO! Y esaki tabata e gasto mas halto pa nos cuido medico. Y obviamente esaki tabata nifica un gasto halto pa e cuido cardio-vascular den exterior.
Si a sigui cu e proyecto, awe nos lo a no a solamente “bezuinig” hopi, pero tambe nos lo por a preveni masha hopi mes. E facilidad aki lo tabata un asina yama “one-stop-shop” cu lo a ofrece TUR servicio cu tin a base di OBESITAS y DIABETES!! E parti di PREVENCION lo tabata tin un lugar prominente den full e set-up di ImSan.
Aruba a perde un oportunidad unico pa ofrece un cuido medico moderno di un tecnologia hopi avanza riba tereno cardio-vascular!! E cuido cardio-vascular lo por a duna Aruba e oportunidad pa ricibi Mericanonan cu apesar di tin acceso na e cuido aki pa medio di Obama-care(mas o menos 30 MIYON hende), no por a laga haci esaki na Merca pasobra e ta demasiado caro. Nan a bay busca e cuido afo manera na India, Colombia, Trinidad etc etc. Si Aruba a haya parti di e patientnan aki anto ImSan lo tabata completamente “self supported” y nos lo a conoce un comienso di turismo medico. Sin papia cu ya tabata tin discusion tabata tuma lugar cu e patientnan di Corsow y di BES lo por a bin Aruba pa e cuido aki tambe! Igualmente tabata tin den “pipeline” un acuerdo cu 3 cirujano plastico di renombre internacional cu tin clientenan di tur parti di mundo cu potencial financiero grandi, pa bin hasi cirugia plastico/cosmetico!!! Esaki no solamente ta nifica benificioso pa ImSan, pero tambe un “up-grading” di e calidad di e turista cu lo a bin keda por lo menos 1 siman na Aruba den hotelnan di 5 strea!!
Sin papia di e otro operacionnan cu por a ser hasi na ImSan.
Aparte di a perde e posibilidad di acumula un extra entrada pa caha di AZV y gobierno, a aumenta gasto ora cu a saca e Swiss-model for di nos ley di LTU. E exigencia pa incorpora un examen medico pa tur imigrante cu kier bin traha aki, a wordo elimina. No a haya necesario mas pa screen si e imigrante tin cualkier malesa entre otro contagioso of cronico cu lo rekeri un gasto adicional pa AZV y no pa e doño di trabou. Cu e Swiss-model por a admiti un imigrante pues cu un bon estado di salud y SIN nan famia. E imigrante no lo tin tempo pa bira malo!! E cifranan di AZV por prueba esaki ora compara e gasto averahe di esnan cu NO tabata “vergunninghouder” y esunnan cu ta na Aruba den e concepto di Swiss-model y e maneho di Zero corupcion y Zero excepcion!!
Ta wordo premira cu lo NO bay tin placa pa inverti den prevencion y e turismo medico a bira un utopia. AZV tin gastonan adicional cu ya caba a responsabilisa nan mes pa nan. Cu reducion di 35 miyon florin AZV ta para dilanti di un reto grandi. Riba cua area di salud lo por bay reduci gasto? Turismo medico lo bira hopi dificil principalmente si tene na cuenta cu covid-19 lo laga turista busca su cuido na cas mes. Un otro mercado tambe a bay perdi, esta patientnan for di e islanan di Caribe hulandes ya cu Corsow tambe tin e mesun facilidad cu nos. Elo bira pues un reto pa waak posibel areanan cu lo por scapa AZV placa sin cu lo perhudica e cuido actual na Aruba.
Loke a bira evidente ta cu e normal nobo lo mester inclui cu nos pueblo lo mester cuminsa dedica mas atencion pa su estilo di bida. Prevencion ta cuminsa na cas. Enbes di bishita e tantisimo snacktrucks y fastfood, ban cushina cuminda saludabel na cas.
Hunto nos lo por logra pa alo largo baha e gastonan di AZV sin cu mester torno ni perhudica e cuido medico.