Home International E pandemia a trece cune un crisis global di salud mental, esaki...

E pandemia a trece cune un crisis global di salud mental, esaki segun United Nations y WHO

SHARE

Globalmente e pandemia di coronavirus a trece hunto cune un crisis di salud mental. Segun United Nations y World Health Organization (WHO), particularmente esnan cu ta traha den cuido medico y muchanan ta esnan mas afecta.

Director di WHO, Tedros Adhanom Ghebreyesus, a duna di conoce cu “e impacto di e pandemia riba hende su salud mental ta algo extremamente preocupante.”

Durante e pandemia, segun un rapport di United Nations, un 47% di personal di cuido medico na Canada a raporta un necesidad pa sosten psicologico, 50% di personal di cuido medico na China a raporta sintoma di depresion, 42 % di trahadornan den cuido medico na Pakistan ta sinti bou un presion psicologico y 26% ta sinti esaki severamente.

Na Italia y Spaña, mayornan a raporta cu durante shelter in place, 77% di muchanan tawata mustra dificultad pa concentra, 39% tawata sinti onrustig, 38% tawata sinti nervioso y 31% tawata sinti soledad.

Den un otro estudio haci riba hobenan cu tin algun historia caba di enfermedad mental y cu ta bibando den Reino Uni, 32% a indica un empeoramento den nan estado mental. Mientras un otro enquesta Mericano a indica cu 45% di e populacion ta sinti cu nan ta bibando den angustia.

Director di WHO a splica cu “isolacion social, miedo di contagio y di perdida di miembronan familiar ta aumenta e angustia ya causa pa perdida di entrada y empleo.” Tedros a continua na declara cu cuido pa salud mental mester ta un di e elementonan central pa locual ta recuperacion di e pandemia.

Segun Tedros, “esaki ta un responsabilidad colectivo di gobierno y sociedad, hunto cu sosten di henter e sistema di Nacionan Uni. Un fayo di tuma hende nan bienestar emocional na serio lo resulta den un costo a largo plazo economico y social.”


Personanan cu ta sinti un necesidad pa papia tocante nan salud mental por yama gratis y anonimamente na 2810909. Aki tin profesional di e team di Sociaal Crisisplan cu lo por combersa y purba na yuda bo persona. E profesionalnan aki tey entre 2or di atardi ta cu 8or di anochi.