ORANJESTAD, Aruba – Pa sigui minimalisa e transmision di COVID-19 na Aruba, ta necesario pa introduci cambionan pa por garantisa distancia fisico y bon higiena na lugarnan publico.
Un di e seccionan hopi bishita pa publico na Departamento di Salud Publico ta Dienst Warenkeuring en Hygiëne cu ta encarga cu e certificado di salud of tambe yama “carchi berde”. Prome cu e pandemia di COVID-19 clientenan por a cana yega na cualkier momento pa aplica, renoba of busca nan Certificado di Salud. Den e normal nobo nos tin pa bay custumbra cu esaki ya no ta e situacion.
Pa aplica of renoba Certificado di Salud entrante dialuna 11 di mei 2020 mester haci un cita. Pa haci un cita por subi e website di DVG cu ta www.dvg.aw y haci cita. Pa esnan cu no tin acceso na internet nan por yama 5224277. Citanan ta wordo duna riba dialuna y diaranson y cliente mester presenta na e cita na e orario stipula. Pa aplica of renoba mester cumpra un stampia di afl 30,- na Departamento di Salud Publico su seccion di Finanza y e cliente mester trese tambe prueba di indentificacion. E pruebanan di indentificacion mester ta un cedula di Aruba valido of un papel di 5,- di censo (no mas cu 6 luna bieu). Aserca mester trese tambe un rijbewijs of un paspoort valido. Ta importante pa informa cu seccion di Finanza ta traha solamente cu pago electronico y no ta accepta placa cash.
Pa esnan cu tin pa busca nan Certificado di Salud, nos kier informa cu nos ta bezig cu planificacion di esaki y manera cu nos seccion ta cla cu e planificacion nos lo informa e orario y dianan pa bin busca.
Departamento di Salud Publico ta haci un suplica na tur cliente pa cumpli cu e condicionan stipula na beneficio di salud di un y tur. Es cu no atene su mes na e condicionnan lo no por ricibi servicio.