12 di mei mundo henter ta uni pa celebra y gradici ciudadanonan den salubridad. Gobierno di Aruba diamars anochi a uni hunto cu e Organisacion di Erfermeronan di Aruba, ODEA, pa asina duna homenahe cu un aplauso nacional na no solamente esnan den cuido di salud sino tur esnan cu tur dia ta brinda servicio di prome necesidad na nos pueblo.
ODEA pa e ocacion aki a organisa e Aplauso Nacional na unda cu tempran den siman a cuminsa pidi Aruba pa for di unda cu nos por ta, pa uni den e iniciativa aki y aplaudi e bon y incansabel trabou di nos ‘frontliners’. Esakinan ta hendenan cu ta sacrifica nan salud, nan bida y nan famia pa por percura pa otronan por ta sigur y salud.
Dilanti Bestuurskantoor, pa 8or di anochi, Prome Minister Evelyn Wever-Croes, Minister di Husticia, Andin Bikker, Minister di Salubridad, Dangui Oduber y Secratario di Conseho di Minister señora Grace Koolman tawata presente pa den nomber di Aruba aplaudi y gradici nos ‘frontliners’ mientras cu autonan tawata pasa y Saluda cu nan pitro mustrando asina tambe nan gratitud na nos ‘frontliners’ especialmente den e temporada dificil cu ya nos ta pasando aden pa dos luna caba cu e presencia di Covid-19. Por a nota un banner golga y bunita ilumina cu lo keda pa e proximo dianan.
Prome Minister Evelyn Wever-Croes: “Esaki ta algo inmensamente grandi. Den circumstancianan hopi dificil nos ‘frontliners’ ta haña nan mes ta traha pa asina sigura pa abo por ta trankil y salud na bo cas. Ta berdad cu cada frontliner na momento di acepta e trabou aki tawata sa cu esaki ta parti di e trabou, pero den e circumstancianan aki cu nos ta bibando, nan a demostra cu no solamente nan a tende di dje of cu nan sa kico e ta, sino nan ta aplic’e cu alma y cuerpo pa nos por sinti nos mes mas sigur y saludabel. Den nomber di Gobierno di Aruba un danki di curason. Nos tambe ta uni nos mes den e iniciativa pa duna un minuut largo pa duna danki na nos ‘frontliners’ cu ta tene nos sigur”.
Minister Andin Bikker: “Awe mi tambe ta uni na e bunita iniciativa di ODEA y den nomber di Gobierno di Aruba y di Aruba, mi ta gradici cada ‘frontliner’, especialmente awe riba dia internacional di Enfermeronan, pa nan pasenshi y dedicacion. Dios bendiciona cada un di boso.”
Minister Dangui Oduber: “Awe nos a uni den e iniciativa di ODEA pa tuma un minuut pa aplaudi nos ‘frontliners’ cu a duna tur loke nan tin y por durante e 8 simannan cu Covid-19 ta presente na Aruba. Awe riba dia special di Enfermero, y tur dia, nos ta keda gradici nan pa nan esfuerso, dedicacion y compromiso pa brinda cuido durante e tempo dificil aki.”
