Home » Ex Prome Minister Nelson Oduber: “Mi ta pronostica cu mescos cu na 1985, pa haci e gobierno actual daño, ta keda traha trampa pa destabilisa nos pais”

Ex Prome Minister Nelson Oduber: “Mi ta pronostica cu mescos cu na 1985, pa haci e gobierno actual daño, ta keda traha trampa pa destabilisa nos pais”

by Admin
0 comment 52 views

Caha di triki Hulandes, mediante CAFT ta den pleno ehecucion. Lo ta bon mi conta esaki pa nos generacion mes por husga ken ainda kier nos bon. Nos Bestuurscollege cu como nos consehero general Betico Croes, mirando cu door di e ceramento di e refineria na 1985 nos a perde 40% di nos GDP y cu un desempleo di casi 22%, nos a acerca Hulanda pa un “overbruggingskrediet” di 100 miyon florin pa por a pasa e periodo di 2 aña, haya tempo pa yuda nos economia y pa por a crea cuponan di trabao.

Recomendacionnan di IMF
Hulanda a pone como condicion cu apesar cu nos no ta independiente cu mester laga IMF bin “licht door” e situacion financiero y a bin cu yen di recomendacionnan, manera baha salario di tur empleado publico di 7.75% – 8.5%, introduci un impuesto di solidaridad di 8.2% plus kita tur subsidio etc. Acerca a bin e recomendacionnan di UNDP pa redobla e cantidad di cambernan y bay completamente den turismo. Door cu nos a cuminsa ehecuta e plan “Sasaki”, pa construi infrastructura di 100 ha pa facilidadnan turistico nos por a inicia di biaha. Hulanda a pone como condicion cu promer cu fia Aruba cualkier suma mester tuma tur e medidanan aki prome cu eleccion pa por haya e promer tranche di e prestamo cu a ser parti den 3.

Kico a sosode na 1985?
MEP tabatin su so 13 asiento den parlamento y ora cu a tuma tur e medidanan pa cumpli cu Hulanda su condicionnan, Hulanda no a manda e placa segun priminti prome cu eleccion di 22 november di 1985. Aki bo ta mira cu e actitud Hulandes tabata uno di mala fe pa yuda AVP den coalicion cu 3 otro partido drenta gobierno y nan si a ricibi e placa sin cu nan a haci nada nada! E experiencia aki a crea cerca mi un relacion di hopi desconfiansa den politiconan Hulandes cu semper a pone mi ta hopi cauteloso y prudente cu nan. No confia nan sin mas den nada!

Kico nos ta mira awe?
Hulanda a yuda AVP cu Mike Eman manda e pais aki tecnicamente bancarota cu e mega debe y nan sa cu e gobierno cu a drenta na 2017 tin un tarea sumamente dificil pa paga tur e debenan, unda di cada florin cu drenta 97 cen tabata bay pa paga debe so! AVP/CDA a laga nos pais casi ingobernabel! E gobierno nobo a logra baha e debe crea pa AVP te na 80 cen y hasta e ultimo presupuesto tabatin un surplus! Awor no ta MEP ni coalicion a trece e pandemia Corona Virus cu tin henter mundo financieramente, economicamente y socialmente na werki. Aruba a perde mas cu 80% di su GDP cu ta dos bes mas grandi cu tempo di ceramento di e refineria na 1985. Companianan grandi tur dia ta declara bancarota y ta den kiebra. Na Hulanda mes segun e Ministro di Asuntonan Social masha hopi hende lo bay perde trabao. Cu tur e facilidadnan turistico y comercial practicamente cera ta mas cu logico cu Hulanda, cu pa a hinca nos den Reino a bisa nos cu nos lo yuda otro den tempo dificil, awor no kier cumpli sin traha trampa. E ta un obligacion moral segun Statuut pa yuda nos den e tempo dificil aki.

Caha di triki di Hulanda
Awor kico Hulanda ta haciendo – usando CAFT y AVP, Simar, SPA y SEPPA – ta pa bin cu e trampa di kita 1500 ambtenaar den un tempo cu no tin trabao ningun caminda y p’asina crea caos y problemanan social. Bo ta mira e caha di triki di gobierno Hulandes, unda ta laga CAFT cu AVP haci e trabao sushi pa pone e gobierno trompica. Cada bes – contra recomendacionnan di expertonan hasta di IMF y hasta di gobierno Hulandes – ta keda “ schroef op” e presion pa baha gasto, mediante kita pan for di boca di hende cu den tempo di un pandemia ta un “crimen humano” contra un nacion cu no a inventa e Corona Virus”.

Mi ta pronostica cu mescos cu na 1985 pa haci e gobierno daño ta keda traha trampa sushi y baho pa destabilisa nos pais. Lo bo mira proximo dianan con hopi nos ta solidario cu otro den e Reino Hulandes, unda cu ya e movecion politico a la “souffleur” pa bira municipio directamente bao Hulanda ta parti integral di e wega. Duel mi di mira cu ainda tin traidornan cu kier haci mal uso hasta di e dolor di e Corona virus. Proximo luna bo mes sinta observa e wega y kendenan aki tambe ta parti di dje pa bolbe traiciona nos mescos tempo di 12-8 cu a hinca nos den Antias y awor 70 aña despues kier hinca nos directamente bao Hulanda. Lutjes land, municipio colonial nobo cu yen di traidor ariba dje. Bida sa ta cruel cu “my own people” atrobe den e wega!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio