Mientras Pueblo ta cumpli, ta keda cas, comerciantenan ta trata na habri nan negoshi cumpliendo cu tur e reglanan, Niun dia e negoshi di prostitucion na San Nicolas a cera, bar a cera, pero prostitucion semper a sigui.
Rembrandstraat/Jan Steenstraat/Caya Captain R. Rodger – April 27 Arubanative.com a publica cu den cayanan di San Nicolas, specialmente e cayanan ariba menciona e negoshi di prostitucion no a stop ningun dia. E publicacion a sali door cu nos ta memey di un Pandemia, di un Virus desconoci pa humanidad cu no ta distingui.
Gobierno a crea un Team cu ta e Crisis Team pa asina por maneha e crisis y trata na contene Covid-19 pa asina e no sigui plama.Un lista a wordo publica di tur locual ta esencial y no esencial.Ariba e lista di NO esencial ta aparece claramente bou recreatie number 21 lo siguiente:
Inrichtingen waar bedrijfsmatig golegenheid wordt gegeven tot het verichten van seksuele handelingen met of voor een derde of bedrijfsmatig gelegenheid wordt gegeven tot het verrichten van seksuele handelingen met of voor een derde of bedrijfsmatige vertoningen van erotisch-pornografisch aard.
Lamentablemente mester bisa cu e damanan aki of doñonan di e barnan cu ta trecenan Aruba no ta mantene nan mes na e ley.
Diasabra tanto durante dia(Shelter-in-place) y anochi algun rato prome cu toque de queda, e industria aki keto bay ta basta activo y na bista di tur hende cu pasa den e cayanan aki, incluyendo autoridad cu ta supose di ta patruya den cayanan aki y no ta actua contra e prostitucion cu ta contra ley actualmente. Of no tin polis mas na San Nicolas cu ta patruya den hanchinan. Si no kier pasa den hanchi den un patruya, por uza un di e centenares di autonan cu Gobierno ta huur pa Cuerpo Policial.
Kiko ta e motibo cu e damanan aki si ta permiti pa eherce nan trabou no ta conoci? Of lo tin un excepcion pa cu esaki? Varios hende ta bisa cu e hombernan tin nan necesidad pesey ta laganan sigui traha. Awel un yiu, un nieto tambe tin e necesidad di mira su mama, su wela, pero e SI no por bay bishita su mama na un lugar di anciano, paso e por ta un riesgo pa nos grandinan. Mientras hombernan libremente Si por bishita e prostitutanan cu tur e riesgonan cu e ta trece cu ne. Otro pregunta ta, si e prostitutanan aki ainda ta bay e control medico di tur siman na DBZ/ Gezondheidsdienst.
Prostitucion ta un trabou di alto riesgo pa contagio, paso ta trata di un contacto intimo y cu tur e consecuencianan cu e ta trece cune den e pandemia aki.. Durante cu e imagennan aki a wordo tuma, por mira clientenan yegando y saliendo for di e cambernan di prostituta, mientras cu polis no ta haci net nada contra esaki. E Warda di polis di San Nicolas, ta algun 100 meter leu di e centro di prostitucion, pero asina mes nan No ta actuando contra e negoshi aki. Task Force ta controla severamente, nan ta cera supermarket pasobra no tin un hende pa spray handsanitizer den man di clientenan, ta pasa controla tur caminda hopi streng, mesora ta cera supermarket of cualke restaurant, esaki sigur ta di aplaudi, pero unda tin mas riesgo di contagio ta kijk door de vingers.
Siman pasa hefenan di polis a bay te na un Villa den Noord pa gara algun colega den e Villa y a schorsnan, ta incomprendibel cu e negoshi di prostitucion cu ta pasando bou nan wowo y no por tin un hefe na San Nicolas asina straight den su trabou, cu por sali actua?. Ken sa kiko tur ta pasa den oranan di marduga durante Toque de queda. Paso algun rato prome cu Toque de queda a cuminsa tabata tin clientenan drentando cerca e muhenan aki. . Tin asina hopi restriccion pa e pueblo, pero pa sorpresa di tur esnan cu si ta mantene nan mes na e margen di ley, ta pasa y mira e damanan aki trahando, bati na bo glas di auto y bisabo cu nan ta cobrando 50 florin pa cliente.
Nos como pueblo si ta cumpliendo cabalmente y awo a bira tempo pa autoridad, haci su trabou drechi na San Nicolas, y actua contra prostitucion ilegal cu ta e contacto mas peligroso cu ta e contacto intimo, Sin conta e samenscholing di cliente y prostitutanan.
