Home International COVID-19: Miembronan di task force di White House mester isola despues cu...

COVID-19: Miembronan di task force di White House mester isola despues cu personal serca di Trump a test positivo

SHARE

Dr. Anthony Fauci, cual a bira un di e expertonan conoci den Merca su lucha contra e virus, ta haye obliga pa bay den cuarentena. Tres miembro di e White House su task force di coronavirus mester bay isola nan mes pa 2 siman. Esaki a bin pa motibo cu posibelmente nan a wordo exponi na e virus.

Fauci su agencia, the National Institute of Allergy and Infectious Diseases, a duna di conoce cu e ta na ‘riesgo relativamente abou’ pa e virus mirando e grado di exposicion. Te ainda e dokter di 79 aña a test negativo pa COVID-19. Pa awor Fauci lo mester keda traha for di cas y wordo getest regularmente pa e virus.

Esnan di e task force cu tambe ta bezig ta isola nan mes ta director di Centers for Disease Control and Prevention (CDC), Dr. Robert Redfield (68 aña). Tambe comisario di e Food and Drug Administration (FDA), Stephen Hahn di 60 aña. Ambos persona ta bou isolacion pa e siguiente 2 siman. Te ainda ambos a test negativo pa e virus.

Indicacion di un posibel brote di e virus den White House a cuminsa comienso di siman. Diabierna vice presidente Mike Pence su secretaria di prensa, Katie Miller (cual ta casa cu un ayudante di Trump) a test positivo pa e virus. Su diagnostico a bin despues cu un empleado di Trump, cual ta parkeer auto pe, a test positivo.

Na e momento aki Merca tin 1.3 miyon caso registra di COVID-19 y 79,794 morto. Esaki ta cifranan cu a surpasa tur otro pais na mundo.