Home International Teorianan di Conspiracion: Coronavirus y e Desconoci

Teorianan di Conspiracion: Coronavirus y e Desconoci

SHARE

Coronavirus a crea un medio ambiente social ideal pa formacion y plamamento di teorianan di conspiracion. Cu esaki ta referi na e teorianan popularmente conoci como ‘conspiracy theories’. E nomber ta indica exactamente locual esaki ta ensera, e ta teorianan crea pa duna supuesto ‘splicacion’ na cierto eventonan.

Aki hopi vez e teorianan ta wordo acompaña pa pensamento cu un grupo poderoso y macabro tin envolvimento den eventonan global. Pues cu ‘conspiracy theories’ ta papia di teorianan crea pa hende, y no hechos confirma pa medionan o institucionan creibel y confiabel.

Den un temporada turbulento, manera e pandemia di coronavirus, ta comprendibel cu persona ta busca contesta na e problemanan mundial den teorianan di conspiracion. Gran parti di e comunidad ta pasando den incertidumbre pa locual ta nan salud, nan empleo, nan finansas y bida familiar.

Pues individuonan ta busca respuesta y splicacion pa e situacion desconoci cu henter e comunidad global ta aden. Tin un cantidad di teorianan di coronavirus. Esnan mas conoci y cu ainda no tin prueba creibel pe ta cu e virus a wordo crea den un laboratorio y plama intencionalmente den publico.

E teorianan di conspiracion pa locual ta coronavirus ta varia y por hasta contradeci otro. Tin grupo cu ta pensa e virus ta ‘fake’ y tin grupo ta pensa e virus a wordo crea pa deshaci cu un parti di populacion. O tin grupo cu ta haya e virus a wordo crea y plama pa co-fundador di Microsoft, Bill Gates.

E pensamento, cual no ta funda riba informacion di fuentenan creibel y confiabel, ta haya cu Bill Gates kier vacuna tur hende na mundo pa asina hinka microchip den e curpa humano.
Riba paginanan di benta riba medionan social por constant mira debate riba e diferente teorianan di conspiracion. Si no ta 5G, ta coronavirus o ta vacuna di microchip.

E teorianan aki no ta sin consecuencia pa sociedad. Un ehempel ta e informacion eroneo reparti pa locual ta e coronavirus y transmision di e virus. Momento cu hendenan ta cay pa pensamento cu ta eroneo, nan por cuminsa neglisha e medidanan di proteccion poni pa esnan den autoridad.

Un ehempel por ta si persona no ta haya e peliger di e virus ta real. E persona por bay neglisha medidanan manera distanciamento social y labamento frequente di man. Y na otro banda, un persona bou impresion cu e virus a wordo traha y plama intencionalmente pa caba cu un seccion di sociedad global lo no por biba trankilo tampoco.

Banda di e efectonan aki, teorianan di conspiracion cu ta culpa otro persona o pais, por aumenta casonan di xenofobia o racismo. Esakinan tin consecuencianan real pa hende cu despues ta bira e blanco pa atakenan fisico tambe.

Un splicacion pakico tin persona ta kere den teorianan infunda ta cu e ta den e psicologia humano pa busca sentido den locual ta e caos di e momento. Buscando teorianan di conspiracion ta reduci e stress y ansiedad cu ta ser sinti pa cu e situacion. E impotencia cu un persona por sinti ta causa un buscamento bek na un sentido di control.

Hayando teorianan infunda pa kere aden ta un forma cu algun persona a scohe pa yuda nan trece sentido bek den e caos actual. Un parti dificil di e sorto di teorianan aki ta cu instancianan cu purba contraresta informacion eroneo ta wordo tilda di ta forma parti di e conspiracion. Pues personanan no asina liher lo por wordo convenci di e berdad.

E unico forma pa contraresta informacion infunda y eroneo ta pa medionan y institucionan traha pa keda transparente y publica informacion basa riba hechos real. Asina por no solamente trece informacion confiabel, pero tambe reduci e panico y ansiedad sinti den publico pa cu e situacion.