Desde cu Premier Evelyn Wever-Croes a duna di conoce siman pasa cu nos a drenta un otro fase na Aruba, por nota un aire di positivismo. Segun Premier Wever-Croes awor cu e crisis di salud ta mustra di ta domina, ta cuminsa e fase di recuperacion economico. Pa esaki el’a presenta un structura amplio cu lo encarga di tur e trabounan na caminda pa recuperacion economico den un plataforma nacional.
Premier a institui un stuurgroep, cu lo guia e proceso, cu ta consisti di personanan di sector priva y semi-gubernamental y ta raporta directamente na Premier.
Tin tambe un think tank, consistiendo di varios persona prominente den comunidad, entre nan e ex gobernadornan di pais Aruba, pa duna conseho y guia na e stuurgroep.
Bou di e stuurgroep tin, te awor, 3 comision activo.
IMEDIATO: STABILISACION Y ESTIMULO
Den e comsion aki ta tratando di brinda asistencia imediato na companianan, pa asina companianan mantene trahadonan den servicio door di duna e doño di trabou un subsidio di salario. Ademas ta brinda e companianan mediano y chikito un sosten financiero adicional pa cubri otro gastonan. E meta ta pa mantene companianan activo pa nan por mantene nan trahadonan na trabou. Pa esnan cu asina mes perde trabou, tin un asistencia financiero temporal, den e proyecto di FASE. E proyecto FASE a wordo anuncia ya 3 siman pasa, despues di un siman cu e crisis a cuminsa, y tin mas di 10 mil persona cu a registra caba pa e asistencia aki. No ta tur a entrega tur documento, pero ta ser spera cu 3000 pa 4000 persona lo ricibi e asistencia financiero e siman aki.
TERMINO CORTO: FAST TRACK
Den e comision aki lo prepara e proyectonan cu ya caba tabata den fase basta avansa prome cu e crisis a cuminsa, y cu despues cu shelter-in-place wordo finalisa, por start sali cu e proyectonan. Ta trata di inversionnan priva y publico, cu ta genera cupo di empleo pa esnan cu a perde trabou, y cu lo atrae devisas pa fortifica e balor di nos florin.
TERMINO MEDIANO Y LARGO: INNOVACION Y DURABILIDAD
Den e comision aki lo delinea e modelo economico nobo pa Aruba. Turismo lo sigui ta un pilar economico importante ora ta safe pa nos habri frontera bek, pero nos no por keda conta riba turismo so. P’esey e comision aki lo prepara plannan pa un modelo economico nobo, duradero y fuerte, basa riba innovacion.
Cada comision ta consisti di entre 5 pa 10 persona y cada comision lo institui task force riba temanan specifico. Por ehempel, e comision especial di fast track lo tin un taskforce cu lo dedica na elimina e burocracia “red tape” inecesario den gobierno. E comision special di innovacion y durabilidad lo tin task force dedica na sectornan economico prometedor, turismo, economia circular, food security, future of work, enseñansa, pa nombra algun. Lo tin mucho mas task force pa asina brinda expertonan den sector publico, sector priva y NGO’s oportunidad pa participa.
“Poco poco nos ta mira un luz na horizonte. Nos ta mira cu nos ta reactivando nos economia, nos ta mira un poco mas perspectiva, speransa y oportunidadnan. Y no solamente nos lo surpasa e crisis aki pero nos lo sali hopi mas fuerte di dje”, Prome Minister Evelyn Wever-Croes a enfatisa.
Prome Minister un biaha mas ta pidi tur ciudadano, pa porfabor cumpli cu e instrucionnan duna na. Ban mantene 1.5 meter di distancia, mantene na regla di higiene y si bo sinti un sintoma di COVID-19, yama centro diagnostico pa bo haci bo cita inmediatamente. Ta asina so bo ta proteha bo mes, bo ta proteha bo famia y awor nos tin extra rol pa proteha nos bisiñanan, nos coleganan, nos prohimonan. Pasobra asina so cargando e responsabilidad hunto, nos ta logra.