Secretaria general di Nacionan Uni, António Guterres, ta pidiendo un stop na plamamento di odio (hate speech). Guterres a splica cu e virus a los un ‘tsunami di odio y xenofobia, tiramento di culpa y creamento di miedo.’ E secretaria general ta haciendo un apelacion na tur pais pa tuma pasonan pa caba cu e ‘plamamento di odio’.
E secretaria general a splica cu sentimento anti-stranhero a aumenta riba internet y tambe riba caya. E a pone enfasis tambe riba e plamamento di ‘conspiracy theories’ (teorianan di conspiracion) cu hopi vez ta antisemitico, islamofobico o cu ta duna informacion falso riba COVID-19.
Hopi ta speculando ainda e origen di e virus. Guterres a duna di conoce cu personanan migrante y refugiadonan ta wordo culpa como e fuente di e virus. Nan ta wordo rechasa aceso pa trato medico. Tambe e a splica como cu persona anciano ta esnan mas vulnerabel pa e virus, algun memes despreciabel a surgi sugeriendo cu nan ta mas facil pa sacrifica.
E periodistanan, informantenan, profesionalnan medico, trahadornan di NGO’s y defendornan di derecho humano ta actualmente wordo ataka pa simplemente haci locual ta nan trabou. Guterres ta haci un yamada na tur lider politico pa mustra solidaridad cu tur persona.
Tambe e a pidi pa institucionan educativo siña persona reconoce kico ta informacion confiabel (digital literacy) riba internet. Media tambe, particularmente medianan social, a ser pidi pa elimina contenido discriminatorio (p.e. racista, sexista etc). Guterres ta pidi tur hende tur caminda pa para encontra di odio, trata otro cu dignidad y tuma e oportunidad pa parti cariño.”
