Turibana – Diahuebs anochi den careda di 9’or polis a bay Turibana, unda un auto a dal contra un cura di cas. Na yegada nan a topa cu un Nissan Bluebird.
Den e auto tawata tin un pareha, y e dama tawata bou influencia.
A resulta cu e pareha aki a sali di un adres den cercania, posiblemente bayendo nan mesun adres.
Pero, ariba caminda lo a start un discusion.
Segun nos a compronde, debi cu nan tawata discuti nan lo a dal e auto varios caminda prome, y na final a bay termina contra cura di un cas.
Polis na e sitio a constata cu e dama lo ta bou influencia y poco fastioso.
Famia di e dama cu a haya sa di e problema a yega e sitio, pero e dama tawata insisti di no ta bay cas cu e famia.
Eynan e cabayero tambe a bira fastioso y tawata dal e bentana cu man.
Polis a trata na calma e situacion y na final e dama a pense bon y a bay cas cu e famia.
TRS a keda na e sitio pa regla e papelnan y laga kita e auto for di caminda cu Takelwagen.
