Segun Clarisca cu por compara su persona den KPA cu e pelicula The Last of the Mohicans (1992)
Oranjestad – Diabierna den oranan di mainta, e agente policial Sra. Clarisca Velasquez den compania di su abogado Mr. Desiree De Soussa Croes a entrega un denuncia na Sr. Marcel Maduro, hefe di Landsrecherche.
Despues di e entrega Sra. Velasquez y su abogado a tene un conferencia dilanti di e edificio di Landsrecherche.
Aki Sra. Velasquez a duna su banda di medaya, splicando cu e tin 34 aña polis y nunca a hay’e den niun problema. Tambe cu e la retira di politica pa e por bay haci su trabou bek di polis. E la bisa bon cla cu e kier traha, e ta gusta su trabou y cu semper ela gui’a tur e agentenan jong.
Clarisca a splica cu e la huur un Villa, segun nos a compronde tabata na Merlot, den area di Noord. Clarisca lo tabata malo y durante Toque de queda algun colega a bin bishit’e, cual cu nos a compronde for di Clarisca cu esaki no por wordo considera samenscholing. Maske nan tur tabata hunto den e Villa, den un cas of Villa y tambe den e tuin di e villa, maske nan no ta un famia, samenscholing no ta conta. Samenscholing ta conta solamente pa riba caya of na Beach.
Segun Clarisca, su persona y su muchanan no a organisa niun fiesta, nan no tabata burachi y ni droga. E Villa cu e la huur tabata pa nan despedi di otro. Esun cu conoce su persona sa cu e no ta un hende asina y e ta haya hopi lamentabel cu riba medionan social y prensa a skirbi cosnan asina di dje. Tambe e la pone emfasis cu e ta e miho trahador na playa, e polisnan den su ploeg ta e miho agentenan policial na Playa, e ta haya cu e no merece di a wordo trata asina y lo busca husticia pa cu e acto aki.
Tabata den careda di 1’or y 50 di marduga, na momento cu Clarisca y su 4 otro coleganan tabata den e Villa, sinta den tuin, tres colega superior Sr. Phillips, Sr. Molina y Sr. Vrolijk a cana kibra na e Villa. Segun Clarisca nan a actua contra ley, pa motibo cu nan a storm naar binnen, dus pusha porta drenta paden. Nan lo a haya Clarisca sinta den un stul y lo tawata sinti malo, den e tuin di e Villa. E superiornan lo a cuminsa grita y na un forma menasante a diriginan mes na su persona y tambe na e otro 4 coleganan bisandonan cu nan mester presenta 7’or y 45 di mainta na warda. Clarisca tambe a wordo bisa cu e mester entrega su koppel 7.45 di mainta. Clarisca a sigui splica cu e tabata malo y cu e la bay Polie pa motibo cu e tabata tin e sintomanan di Covid-19 y lo a haci tur cos via regla dus meld na BGD.
Clarisca no ta compronde dicon nan a wordo geschors, nan a usa articulo 82 di LMA, cual su persona no sa kiko e ley ey ta encera. E ta pensa cu por ta trata di un persecusion politico, paso e unico cos cu su persona y su ploeg a haci ta meld ziek y cu ta pa esaki nan a wordo geschors.
Clarisca tabata mustra hopi interes pa haya sa con e informacion di locual a pasa na e Villa y su medisch geheim, cu e tabata tin sintoma di Covid-19 pa e motibo aki e la meldziek, con tur e informacionnan aki por a yega riba medionan social. Segun su persona embes di haci investigacion riba locual a pasa na e Villa, lo ta miho pa haci un investigacion den KPA pa saca afo ken ta e djakanan, cu a saca e informacionnan di su persona.
Cuerpo Policial di Aruba tin un tempo largo pasando den turbulencia y escandalonan, unda cu te hasta a retira Korpschef Sr. Andrew Hoo.