Nos ta un isla chikito, pero nos hendenan tin un curason grandi pa yuda otro. Aruba ta pasando den momentonan dificil pa motibo di e pandemia COVID-19. Desde e comienso di e situacion aki na Aruba, Rotary Club Aruba no a sinta keto y a tuma diferente iniciativa pa por brinda ayudo y sosten na esnan cu mas mester di esaki.
Asina aki tambe a aporta AWG 25.000 na e projecto “Happy to Give Back” di CEDE Aruba, den nomber di Rotary Club Aruba, Rotaract Club Aruba, Interact Club Aruba – Schakel College y Interact Club Colegio Arubano.
Nos di Rotary Club Aruba semper a apoya y lo sigui contribui na iniciativanan cu ta na bienestar di nos comunidad. Mas na e momento aki cu ta di suma importancia pa nos comunidad uni cu otro pa brinda ayudo na unda por y mester.
Nos kier a gradici comunidad di Aruba cu ta sostene nos projectonan manera Fiesta Rotaria, Rotary Golf Tournament y nos rifa anual. Cu boso aporte y sosten, Rotary Club Aruba por sigui yuda y contribui na iniciativanan manera “Happy to Give Back”.
Nos ta desea CEDE y su boluntarionan hopi perseverancia y ta convenci cu hunto Aruba lo supera e situacion aki.