Den Haag, Hulanda – Diaranson anochi Gobierno Hulandes a anuncia cu kapsalon nan por habri bek entrante 11 di Mei, cual ta otro siman. Si lo tin reglanan cu mester tene bo mes na nan. Distancia fisico ta keda na vigor y si kier corta cabey lo mester haci un afspraak prome.
Durante un entrevista un propetario y su empleadonan a brinda y tawata sumamente contento cu e anuncio di gobierno.
Segun e propetario, su empleadonan lo haci uzo di mondkapje. Tambe e clientenan di e negoshi lo mester uza esaki durante cu ta corta cabey.
Gabinete di Rutte a anuncia cu lo cuminsa suavisa e medidanan pa cu e Coronavirus. Esaki lo cana den fase. Locual e gobierno Hulandes kier a trece dilanti ta tur locual ta permiti atrobe.
Na Hulanda entrante otro siman ta posibel pa persona bishita barbershop o salon di beyesa bek. Pues propetarionan cu tin negoshi cu ta trata cu hende di cerca por habri atrobe.
Entrante otro siman locual no ta conta mas ta e medida di ‘keda bo cas mas hopi posibel’. Awor e conseho ta pa ‘keda bo cas si bo ta sinti malo o si bo ta sospecha cu bo tin e virus.’
Scolnan secundario lo habri bek ariba Juni 2. Sector di Horeca lo inicia Juni 2, mescos cu cinemanan y teatronan.
Pa locual ta transporte publico, lo bira obligatorio pa bisti mondkapje ora subi den bus, tram o trein. Aunke cu gobierno Hulandes ta opina cu e mondkapje ta un barera fini contra e Virus.
Ta pidi pa traha bo mes un ‘mondkapje’ y laga e masknan medico pa hospitalnan cu ta den necesidad di dje.
Locual no ta cambia
Esta cu si gobierna mira cu casonan di coronavirus cuminsa aumenta atrobe, nan lo bolbe draai tur cos bek. Pues e medidanan cu a wordo lanta lo wordo buta bek.
Locual si ta keda mescos
Gobierna kier pa hendenan keda mas tanto cas y traha for di cas. Eventonan (p.e. concierto) cu ta trece miles di hende hunto o nightclubs ta keda prohibi, te ora haya un vacuna. Mantene distancia di 1,5 meter tambe ta keda na vigor y laba man y tambe tosa/nister den eleboog.
Gymnan (sportscholen)
Por lo pronto esakinan lo no bin na remarke y lo mester warda te cu September pa mira kico lo bay pasa. Locual ta tennis y golf, sportnan unda cu tin distancia di otro y ta den aire liber, si mag.