Home » Booshi Wever: GERENCIA DI SERLIMAR ABUSANDO DI E SITUACION DI CRISIS CAUSA DOOR DI COVID-19!!

Booshi Wever: GERENCIA DI SERLIMAR ABUSANDO DI E SITUACION DI CRISIS CAUSA DOOR DI COVID-19!!

by Admin
0 comment 61 views

Un paar di siman pasa e “handpicked” director nobo di Serlimar a cuminsa un trayecto pa salbaguardia supuestamente sobrevivencia di Serlimar. Un tarea cu obviamente lo ta casi imposibel door di e herencia devastador cu Otmar Oduber y su otro “handpicked” director a laga. E director no por haci un apelacion na gobierno, pasobra awor si no tin placa. Den un pasado reciente Otmar Oduber a presenta un plan na Parlamento pa haya mas placa pa Serlimar, pero su chantahe pa baha gobierno si e no haya su gana a fracasa, pa motibo di un parlamentaria cu a para firme y no a sucumbi pa reproche di su propio partido.

Ta obvio cu e director lo mester purba sea como sea pa haya un fondo pa por sigui garantisa funcionamento di Serlimar. Enbes di señala e culpabel principal, Otmar Oduber, e ta prefera di tira culpa riba e usuarionan cu NO a paga Serlimar! Nos tur sa cu e motibo pakico Serlimar ta den su “cataclutch” ta pa motibo di corupcion, fraude y super mal maneho cu a wordo dirigi y instrui dor di Otmar Oduber, sr. Davelaar y e Raad van Toezicht cu representacion di partidonan di gobierno y tambe di Atia.

Awe e director kier bin menasa pueblo cu un carta SIN firma. Pa colmo den e carta ta hasi mencion cu e cobransa ta a base di ley. Pregunta ta basa di cua ley ta mandando e “aanmaning” aki? Loke nos por a encontra ta dos Lbham. Uno di 1998, cu ta regla cuanto por cobra y pa nos sorpresa nos ta encontra un “Intrekkingsbesluit” di januari 2019! Cu otro palabra “meneer de handpicked directeur”, ta bo gobierno POREDmep mes a “trek” loke lo por a cobra “in”! Dicon no ta bay door di e file cu por saca afo exactamente na unda mester bay busca pa saca placa pa pone Serlimar draai manera mester ta? Tambe cuanto di tur e cobranza cu a sali, realmente ta toca Serlimar y cuanto ta di otro companianan priva?

Aparte cu tanto gobierno POREDmep como Raad van Toezicht ta e culpabelnan mayor di e desaster na Serlimar, e PARLAMENTO “NOBO” den su TOTALIDAD a faya den nan funcion como controlador. Nan tur, cada un a haya e file cu a wordo entrega na OM unda na placa chikito y cu tur e detayenan por a saca afo cu fraude y corupcion na gran escala a tuma lugar den e.o. e otorgamento di e proyecto di e incinerator chikito. Recientemente e presupuesto di DOW a wordo trata, y ni un SOLO pregunta riba esaki. Aki e proverbio hulandes a conta: “WIE ZWIJGT STEMT TOE”!!!

Despues nos ta tende e minister responsabel pa e cartera, cu su lider a laga atras pesta cu corupcion, ta “doodleuk” bin tira culpa riba COVID-19 cu e incinerator chikito no ta traha ainda!! Aki tambe ta conta: “wie zwijgt stemt toe”! For di dia 28 di december 2018 cu masha urgencia e sponsor di Otmar Oduber a wordo paga pa e incinerator chikito. Esaki tabata urgente paso loke cu un otro compania local ta haciendo cu e sludge ta un “crimen” contra nos pueblo!! Ironia di bida: cua compania keto bay ta cometiendo un crimen contra nos pueblo? Cu aprobacion di ken!!?? E mesun compania keto bay TA haciendo e trabou!!
Un pregunta, sin papia di e fraude y corupcion den e proyecto aki, tin placa den presupuesto di DOW pa opera esaki? Serlimar tin placa pa esaki? Corda ta un proyecto cu duracion di 5 aña, cu tin un gasto total di mas di 16 miyon florin. Y ni un solo pregunta ta wordo haci? Un proyecto di e magnitud asina por bai “bow man”?? Kom nou!!

Manera ya a wordo bisa cu tin varios hende na Serlimar ta wordo kita y ainda tin mas cu mester bay riba e altar di sacrificio pa caba di laba cabez di Otmar y su gang di bandido. E hecho aki ta prueba atrobe cu Caft tin razon cu a tuma hende pa loco, sin cu esaki ta presupuesta y ni ta necesario. Y esnan cu a “colabora” cu e acto penal aki no ta wordo poni responsabel? Pa colmo awor ta spanta e empleadonan cu lo bay manda Serlimar “failliet” pa despues tuma hende back den servicio. Ta varios yamada di empleadonan nos a ricibi. Un biaha mas nos mester constata cu maluso y hasta ABUSO ta wordo haci di situacion di e crisis causa door di COVID-19! Y mas tristo dor di gerencia riba instruccion di e gobierno POREDmep!
Pa colmo den tur e problema financiero di Serlimar pa colmo ta nombra “handpicked ” tambe un director financiero cu salario gordo y cu ta un familiar di un di e miembronan di RvT . Pakico esaki? Pa sconde cualkier documento cu e familiar aki por ta meti aden? Cu otro palabra fiesta ta sigui!!

Nos ta spera cu Parlamento un biaha mas NO sucumbi pa e presion pa pasa e cambio den e ley di Serlimar di 2005. E ley aki ta solamente pa placa drenta den Serlimar pa asina ey e placa bou mesa sigui lora manera tabata desea! Ban spera cu pronto Ministerio Publico pone man riba Otmar cu ta esun cu tin un denuncia oficial entrega den su contra y cu keto bay ta sigui “call the shots” den e gobierno POREDmep aki.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio