Varios pais, incluyendo Aruba, a cuminsa e transicion na locual hopi ta yamando ‘e normal nobo’. Ta trahando abase di fasenan di flexibilisacion di medidanan, esaki ta un plan di 4 nivel. Nos ta actualmente na e prome nivel di flexibilisacion, cual ta di e periodo di 4 di Mei te cu 17 di Mei. E nivelnan ta duna espacio pa evalua e pasonan necesario.
Director General of the World Health Organization (WHO) ,Tedros Adhanom Ghebreyesus, a duna un advertencia na paisnan cu ta purbando di suavisa restriccionan. E cabesante di WHO ta splica cu si no ta “extremamente cauteloso y trahando abase di fase” paisnan lo haya nan ta bay bek bou lockdown.
Paisnan cu no maneha e riesgonan cu ta bin hunto cu lantamento di restriccionan riba bida publico, lo por mira casonan di COVID-19 aumenta atrobe. Y asina mas biaha lo mester bin cu medidanan cu ta prohibi ciudadanonan di move liber den publico.
WHO ta bou hopi critica pa e manera cu nan a atende cu e comienso di e brote di COVID-19. Tedros ta para tras y defende e hecho cu ta di comienso di Januari caba e cuminsa informa Mundo riba e transmission di e virus.
Epidemiologo di WHO, Maria Van Kerkhove, ta splica cu ainda e agencia ta buscando e origen di e virus. “Sin sa cua ta e animal di origen ta dificil pa nos preveni esaki di sosode atrobe.”
