Oranjestad- Schoolexamen a cuminsa y e biaha aki esaki ta bai un tiki diferente cu añanan anterior. Sin embargo, e team completo di Rotaract Club of Aruba kier desea tur studiante cu a cuminsa cu nan SE-3 hopi exito durante e periodo aki. Cu hopi dedicacion y perseverancia tur cos ta posibel.
Cu un otro fin di aña escolar den porta, studiantenan den examenklas ta trahando duro pa asina logra slaag y asina obtene nan diploma. E exito di cada studiante ta un combinacion di nan trabou y dedicacion pa nan estudio, nan famia cu ta sostene nan y e diferente maestro/-anan cu ta traha incansablemente pa asina brinda un educacion superior.
Pa 5 aña caba Rotaract Club of Aruba su miembro y boluntarionan ta uni hunto cu e famia y maestronan bou di e proyecto cu ta carga e nomber di ‘The Graduation Project,’ pa asina brinda e studiantenan extra apoyo durante e aña dificil aki. Esaki ta un proyecto cu e mision pa guia, motiva y duna tips valioso cu e studiantenan por haci uzo di dje den examenjaar y tambe den transcurso di nan estudio.
Alabes, e team di ‘The Graduation Project’ kier haci uzo di e oportunidad pa corda tur studiante pa join e campaña di ‘Like & Share’ e post tocante ‘Study Tips’ y asina tin chens pa gana un Samsung Galaxy Tab A tablet! Pa participa ta facil: Simplemente bishita Rotaract Club of Aruba su pagina di Facebook, like y share nos video di ‘Study Tips’, tag bo scol cu bo ta bishitando y comment kico ta bo plannan despues di gradua.
Na tur studiante, Rotaract Club of Aruba kier deseabo hopi exito e dianan aki cu boso ultimo examen pa cu e aña escolar aki. Nos sa cu boso a traha duro, djis pensa awor e diploma ey ta den bo man!