Nos fondonan social di AZV y SVB ta wordu manteni cu placa di gobierno, e doñonan di trabao y e trahadornan. Actualmente gobierno casi no tin placa pa mucho luna mas, doñonan di trabao mayoria ta sin entrada y 37000 trahador ta desemplea. Nos mester ta consciente si cu si tin 37 mil hende sin trabao, nan no por paga prima di AZV ni prima di AOV/AWW y esaki ta haci cu nos fondonan social ta den problemanan serio. E situacion aki mi ta calcula cu hopi ehercicio nos por want’e pa 3 luna mas.
Discusionnan innecesario
Segun tur pronostico di cientificonan e pandemia su efectonan lo dura mas cu 2 aña. Dios duna cu lo tin cientificonan medico por traha un vacuna pa mundo mas lihe posibel! Si mi ripara e discusionnan di politiconan riba placa pa renoba Cas di Aruba y placa pa decoracionnan pa fin di aña, discusionnan entre sindicatonan ariba 5% di reduccion di salario ta un prueba cu nos tin hende cu ainda no ta consciente di con grandi e problema financiero cu nos tin cu deal cu ne ta! Pa tur hende, locual tabata por awor no por mas! No pasobra no kier, pero ni Hulanda lo sigui yuda nos pa haya prestamo tanten cu no por pone orden tur caminda. E normal nobo lo ta drasticamente diferente pa tur hende. Lo no ta facil pa ningun hende, e ta haci hopi dolor, pero esaki ta e realidad.
Gobierno lo por keda yuda?
Bo ta consciente cuanto compania lo no sobrevivi e problema aki? Cuanto lo bay bancarota y cuanto tempo lo tuma pa purba yena e hotelnan atrobe cu turista? Bo ta kere cu gobierno lo por keda yuda? Ta nos mes cu cabes friu y cu sentido comun di responsabilidad di un pa otro y solidarismo mester yuda cu cada un nan conocimento y experiencia pa sali afor. Mucho tempo ta bay perdi na haci politica barata, mediocre, muchachada, wega cu no ta yuda cu nada. Hecho ta cu Pueblo no por come for di infantilismo!
Esaki ta mi contribucion pa mañan bo no bisa cu ningun hende no a bisa bo kico ta warda nos tur. Cu hopi dolor mi ta pone e cos aki, pero mi ta sinti mi yama pa spierta kico ta warda nos y cu no tin espacio pa gana voto ni gloria. Un pueblo sin trabao cu hamber, desespera pa cria su famia ta solucion e kier y no wega!