Caracas, Venezuela – Diadomingo pasa gobierno Venezolano a duna di conoce cu nan a logra frustra un supuesto invasion maritimo. Durante e captura forsanan Bolivariana a asesina 6 persona y a logra captura 2 ‘mercenario terorista’.
Segun e minister di asunto interior, Nestor Reverol, a splica cu e grupo tawata tin como meta pa via lancha logra drenta e pais, asesina e lider di e gobierno socialista, crea caos entre e pueblo y asina treciendo un golpe di estado. E gobierno ta di pensamento cu Merca ta tras di e plan aki.
Merca ta desmenti cualkier envolvimento den e plan pa baha gobierno di Nicolas Maduro. E incidente a ocuri na un momento cu ya tension ta halto entre Venezuela y Merca. No ta yuda tampoco cu dos miembro di e grupo ta ex-militar y ciudadanonan Mericano.
Autoridadnan Venezolano a detene locual nan ta yamando 13 ‘terorista’. Manera a bisa caba dos ta ex-militar Mericano: Airan Berry di 41 aña y Luke Denman di 34 aña. Nan ta dos persona cu a sirbi den e guerra di Iraq.
Ex-militar Jordan Goudreau a bin dilanti diadomingo anochi informando cu e ta tras di e plan fracasa aki. Goudreau ta cabesante di un compania di seguridad yama, SilverCorp USA, cual ta basa na Florida. Segun Goudreau ta duna di conoce, e plan tawata pa captura Maduro y no pa asesina.
Pues e ciudadano Mericano tawata tin e intecion di ‘libera’ Venezuela for di mando di Maduro. E operacion aki a wordo plania cu un budget hopi limita. E plan aki a bin despues cu nan a firma un acuerdo cu e politico opositor di Maduro, Juan Guaido. E politico ta e supuesto lider legitimo di Venezuela y ta conta cu sostene di Merca y casi 60 otro pais.
Goudreau a acusa tambe Guaido di fayo di pago pa e plan cu a resulta den algun morto y tambe captura di dos ciudadanonan Mericano. E Fiscal General di Venezuela, Tarek William Saab, a splica cu SilverCorp USA tawata tin un acuerdo di 212 miyon dollar cu Guaido. Esaki ta supuesto fondonan cu mester a sali for di PDVSA su subsidiario Mericano, CITGO, cual actualmente ta bou comanda di e lider opositor di Maduro.
Guaido ta nenga cualkier envolvimento den e plan di Goudreau. Guaido a splica cu Maduro no ta bisando cos manera cu nan ta. Tambe e ta acusa Maduro di uza e momento aki pa kita atencion di e problemanan interno di e pais.
