Home » Prome Minister Evelyn Wever-Croes: Conmemoracion di e fayecidonan di e di dos guera Mundial: NUNCA LUBIDA E BALENTIA Y SACRIFICIO DI TUR ESNAN CU A PERDE NAN BIDA PA NOS LIBERDAD

Prome Minister Evelyn Wever-Croes: Conmemoracion di e fayecidonan di e di dos guera Mundial: NUNCA LUBIDA E BALENTIA Y SACRIFICIO DI TUR ESNAN CU A PERDE NAN BIDA PA NOS LIBERDAD

by Admin
0 comment 65 views

Riba e fecha di 4 di mei, tur aña den Reino Hulandes ta conmemora esnan cu a lucha y a fayece durante e di dos guera mundial. Ya ta 75 aña cu e di dos guera mundial a finalisa. Prome Minister Evelyn Wever-Croes, pa conmemora e hecho importante aki, hunto cu Gobernador di Aruba, señor Alfonso Boekhoudt a rindi homenage na tur e heroenan aki di guera mundial na e monumento pa esnan cu a cay den e di dos guera mundial situa na Adriaan Lacle Blvd. Un ceremonia inusual na unda cu a tene cuenta tambe cu distanciamento social y e biaha aki no a invita famia, militar ni publico na e ceremonia.

Prome Minister den conferencia di prensa dialuna anochi, a accentua e importancia pa nos comunidad y mundo henter biba den paz y pa nunca lubida e balentia y sacrificio di tur esnan cu a perde nan bida pa nos liberdad.
“Ta hopi importante pa nos realisa y balora con importante e ta pa nos biba na paz y cu nos no kier guera mas. Awor naturalmente e situacion cu nos ta pasando aden awe cu e Corona virus bo no por compar’e cu un di dos guera mundial pero e lesnan cu nos a siña di e di dos guera mundial awe ainda ta hopi aplicabel.

Tolerancia pa pensamento di otro, respet pa opinion di otro, union y solidarismo cu esnan cu tin’e mas dificil. Mi ta kere si nos aplica tur e principionan aki nos lo sali hopi mas fuerte di e crisis aki. Nos a drenta un etapa nobo y cu poder di Dios nos lo pasa e nivel 1 si cada ciudadano pone di su banda pa asina nos bay na nivel dos, tres y cuatro exitosamente. Hunto nos ta bay bek na reactiva nos economia interno completamente. Despues nos lo bay wak kico nos lo bay haci cu nos fronteranan. Cu bon comportacion y disciplina di nos tur, mi ta sigur cu nos lo logra”, Prome Minister Evelyn Wever-Croes a expresa.

Na e sitio a tene dos minuut di silencio pa paz y contra guera y recorda tur esnan cu ta victima y a precidi nos den e lucha aki pa libertad y tur nan sacrificionan. No solamente pa e victimanan, pero tambe pa e sobrevivientenan y nan famia cu a keda atrás.

Prome Minister Evelyn Wever-Croes: “Ban keda recorda y conmemora nos hendenan cu dia tras dia ta lucha pa e libertadnan, mescos cu tur esnan cu a perde nan bida, pa recobra e derechonan fundamental di pueblo, BIBA NOS LIBERTAD Y PAZ”.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio