Home International Desde December caba Francia tawata tin caso di COVID-19

Desde December caba Francia tawata tin caso di COVID-19

SHARE

Tin evidencia cu e coronavirus por tawata na Francia simanan mas trempan cu anteriormente pensa. Algun dokter Frances ta bisando cu nan a encontra un caso di COVID-19 den December. E dokternan di un hospital na Paris ta bisando cu nan a haya evidencia cu un pashent cu a wordo interna na December tawata infecta cu e virus.

Esaki ta informacion cu nan a ricibi despues di a bay check muestranan colecta den December. Ora cu a test esakinan bek pa coronavirus, un a sali positivo pa e virus. E hecho aki por duna indicacion cu e virus tawata plamando caba den Europa hopi mas prome cu anteriormente pensa.

E equipo medico di e Hospital na Paris a duna di conoce den nan reportahe “COVID-19 tawata plamando na Francia fin di December di 2019, esaki ta un luna prome cu e prome caso oficial den e pais.” Nan estudio a wordo publico den e revista cientifico, International Journal of Antimicrobial Agents.

E prome casonan oficial di coronavirus na Francia a ser raporta riba 24 di Januari den dos persona cu tin un historia di viahe pa Wuhan, China. Un specialista di ICU, Dr. Yves Cohen y su coleganan ta esnan cu a dicidi di bay controla e record di pashentnan den e simanan anterior.

E equipo Frances a controla datos di hendenan interna den hospital cu sintoma similar cu griep entre December 2 te cu Januari 16. Nan a ‘re-test’ e muestranan gevries cu nan tawata tin. Un muestra di un cabayero di 42 aña naci na Algeria a sali positivo pa coronavirus

E homber tin hopi añas bibando na Francia y ta traha como piscador. Su delaster viahe pa Algeria tawata na Augustus 2019. E homber no a bay China, y un di su yiunan tambe tawata malo.

E rapport di e expertonan a splica cu “identificando e prome caso di pashent infecta ta di gran interes epidemiologo como cu e ta cambia dramaticamente nos conocimento tocante e SARS-COV-2 y su plamamento na nos pais.”