Savaneta: Dialuna den careda di 9’or y cuarto di anochi, un habitante di Savaneta ta yama polis bisando cu e la caba di scucha 4 tiro den e caminda di santo pariba di Do it Center. Mesora varios patruya di polis a bay na e sitio.
Na yegada nan a bin topa cu algun persona cu a splicanan cu tabata trata di dos persona flaco, color scur, ambos desconoci pa nan, nan a bin na pia y a pasa los como 4 pa 5 tiro y dje nan lo a bandona e sitio den un Nissan March cora Kima, nan a bay direccion pariba.
Mesora a cuminsa un buskeda pa e Nissan March den cual e dos sospechosonan aki a bandona e sitio cu ne. . Polis a bin topa hopi liher cu dos Nissan March, mesora a para nan y a controlanan pero esakinan no tabata e Nissan March cu polis tabata buscando.
Segun e habitantenan nan a mira un di e personanan aki cu un arma di candela den su man.
E polisnan na e sitio a cera e caminda pariba di Do It den ambos direcion pa asina nan cuminsa busca e hulsnan, tambe a pidi pa presencia di e recherche nan di departamento Tecnico na e sitio. Na momento cu e recherchenan di departamento tecnico tabata yegando na e sitio desconocidonan a manda e van di e departamento aki cu piedra.
Aparentemente dos tiro a cay dilanti Season & Beyond y e otronan a cay dilanti di un cas.
E caso ta den man di autoridad pa mas investigacion.