Home International Paisnan purbando di horta investigacion cientifico riba COVID-19 for di otro, esaki...

Paisnan purbando di horta investigacion cientifico riba COVID-19 for di otro, esaki segun informacion di agencia di Reino Uni

SHARE

Estadonan enemigo ta purbando di horta investigacion cientifico haci riba coronavirus for di otro pais. Esaki expertonan di ‘The National Cyber Security Centre’ (NCSC) a duna di conoce. Ta ser bisa cu Russia, Iran y China ta tras di e atakenan cibernetico riba universidadnan cu ta investigando coronavirus.

E estadonan aki ta purbando di hack universidadnan y otro facilidadnan Ingles pa asina horta entre otro e investigacion cientifico relata cu posibel vacuna pa COVID-19.

Expertonan di seguridad cibernetico, NCSC, a bisa cu atakenan cibernetico di e sorto aki a aumenta ultimo tempo. Nan ta haya esaki un acto criminal hopi lamentabel. NCSC a duna di compronde cu paisnan cual ta inclui Iran y Russia ta tras di e intento pa hack, mientras otro expertonan ta bisa cu China tambe lo ta un actor den esaki.

Tin varios universidad y institucionan cu capacidad biomedico haciendo investigacion riba e virus di COVID-19. Investigadornan ta trahando riba varios formanan nobo pa diagnostica e virus y testnan riba anticurpanan pa asina crea posibel tratamento pa e virus.

Afortunadamente te ainda niun di e atakenan tawata exitoso. Un vocero di NCSC a splica cu nan organisacion ta trahando 24/7 pa yuda e organisacionan afecta.

Universidad di Oxford cual ta un lider mundial den desaroyo cientifico riba vacunacion ta trahando di serca cu NCSC pa proteha nan trabou cientifico. James Sullivan, un persona cu experticio den seguridad cibernetico a splica cu e desaroyo di vacuna ta algo hopi competitivo, e tension entre paisnan ta aumenta incidente di spionahe cibernetico.