Washington, Merca – E maribomba conoci como, Vespa mandarinia, a yega Merca. E insecto gigantesco aki ta wordo yama un asesino. E ta matando centenares di abeha, y ta asina treciendo cultivacion di fruta y berdura cu ta steun riba polinización na peliger.
E maribomba, Vespa mandarinia, ta nativo pa paisnan Asiatico manera Japon, Sur Korea y Taiwan, pero aña pasa a cuminsa detecta su presencia den e estado Mericano di Washington. Ta specula cu e insecto por a yega Merca accidentalmente via container di carga. O cu e a ser treci intencionalmente pa persona cu kier experimenta riba e insecto su potencial medicinal.
E insecto por crece y yega un tamaño di 4 pa 5 cm. Picadura di e maribomba por ta fatal pa esnan cu a ricibi multiple pica, esaki hasta si un persona no ta alergico na dje. Motibo ta cu e insecto ta manda un cierto neurotoxina cu su picadura. Ta ser bisa cu un picadura di e insecto aki ta sinti manera un hero cayente penetrando bo cuero.
Manera menciona e insecto invasivo aki su meta ta pa consumi abeha. Den 1 minuut e tin e capacidad pa decapita 40 abeha. Dentro di algun oras e insecto aki por caba por completo cu neishi di abeha. Abeha ta sostene un balor di 20 biyon dollar di agricultura Mericano.
Criador di abeha den e estado di Washington ta wordo pidi pa raporta na oficialnan di agricultura si nan encontra e ‘maribomba asesino’ aki. Ta pidi pa keda leu di nan paso nan por pica hasta door di e paña protectivo di e criador di abeha.
Entomologo (experto di insecto), Chris Looney di e departmento di agricultura, a pidi pa persona core bay si nan encontra e sorto di maribomba gigantesco aki.
