Sero Patrishi – Diasabra mainta 10:25 polis y ambulance a wordo pidi cu urgencia pa un accidente fuerte altura di Polyrama na Sero Patrishi. Informacion adicional a bisa cu un di e ocupantenan lo a keda den auto sinta sin move.
Mesora varios unidad di polis a yega e sitio y a bay controla esnan herida den e accidente aki. A resulta cu e chauffeur di edad den e Daihatsu Terios ta Sr.Ruiz conoci di e Muffler Shop na rotonde di Tanki Leendert.
E Terios biniendo for di pabou a bay lora na su man robes, pa staciona na e hardware store. Pero lamentablemente no a pone atencion ariba e Nissan March biniendo di pariba cu un velocidad basta halto.
Ariba imagennan di e video por mira con e Nissan March a dal e Terios birando e 360ā°. Den e impacto e Nissan March ta dal dos auto mas cu ta parkeer na e Hardware Store, pa final keda pega contra un Van blanco.
E impacto tawata asina fuerte cu e la move e autonan cu tawata para.
Caminda a wordo cera ambos banda, pa asina polis di trafico por haci nan investigacion y tambe Paramediconan por trata cu e heridonan.
Dos ambulance a presenta y a controla un hoben chauffeur cu tawata na stuur di e March. E segundo ambulance a yega y Paramediconan a papia cu Sr.Ruiz y despues di un rato por a mira cu e la baha, pero no por a cana yega mucho leu.
Paramediconan mester a bin cu e stretcher pa asina e cabayero di edad por a subi ariba y ricibi mas tratamento den Ambulance.
