Home Politics Ex Prome Minister Nelson Oduber: “Responsabilidad di sindicatonan ta tambe pa hende...

Ex Prome Minister Nelson Oduber: “Responsabilidad di sindicatonan ta tambe pa hende keda cu trabao y no pa pone presion pa un grupo so keda bon”

SHARE

Lo ta bon pa mi duna un contribucion di mi añanan di experiencia di tabata trahador y despues como politico den varios funcion como gobernante y den cual mi tabatin masha hopi di haber cu tanto e empleadonan publico como sector priva y sindicatonan cu ta representa e clase obreril. Masha pabien na tur empleado riba boso dia special. Danki di por ta contribui na nos pais su progreso.

Eliminacion di descriminacion den gobierno:
Den pasado tabatatin lidernan sindical cu a destaca den momentonan dificil pa nan tambe. Ora e refineria a cera cu nos perde 40% di nos GDP, y cu hotelnan, restaurantnan etc. tur a keda habri, nos gobierno a haya su mes obliga pa pidi tur hende pa haci sacrificio, unda e ambtenaar a entrega temporalmente 7.75% den un sliding scale te 8.5% y tur empleado den forma di solidaridad mester a entrega 8.2% di un Impuesto di Solidaridad pa solamente 2 aña cu despues a ser prolonga y hasta a bin cu un di 4.1%. Pero asina cu MEP a drenta gobierno na 1989, ya na 1990 nos a debolbe e ambtenaar e 8.5% y a cuminsa un proceso pa elimina discriminacion den gobierno, unda nos a percura pa tur arbeider cu no tabatin casi sin ningun derecho pa bay den vaste dienst y bira ambtenaar pa nan por haya e derechonan segun LMA y cu nan por a bira miembro di pensioenfonds etc. Esaki a ser negocia cu sindicato GABA bao guia di Buchi ‘Panama’ Wever. Cu SEPPA a negocia pa kita e desigualdad cu un hende muher, un soltero tabata cobra 20% menos salario cu e homber casa realisando asina ‘equal work, equal pay’. Tambe pa mamanan soltera cu no tabata haya placa pa yiu, a elimina e desigualdad aki.

Respet pa e sindicatonan:
Djey den transcurso di añanan nos a start e proceso pa independisa WEB, Setar. etc. E lidernan sindical e tempo ey tabata Leo Yarzagaray, Gregorio Wolff y Jerry Rasmijn (dfm), unda pa e ambtenaar entrega su status lo mester haya compensacion. Mescos cu Setar, presidente di STT Bebe Boekhoudt. E proceso aki no tabata facil pa nos y a exigi hopi pasenshi, pero e lidernan sindical tabata responsabel. Tabatin tempo di ciere di e refineria Lago e sindicato IOWUA di e trahadornan di Lago, manera Juan Yarzagaray, Chinto Geerman (dfm), George Silie (dfm), Milo Arendz cu a pasa den tempo hopi dificil di e ciere di e refineria y cu tabata coopera con pa sali afor. Nos tabatin hopi di haber cu FTA, muy en particular algo cu lo mi keda corda ta ora cu a habri e refineria Coastal y a trece 800 Turco cu contratonan firma aya, unda a hinca hospedahe y cuminda como salario y FTA a representa e trahadornan y den un caso sumario a gana e caso dificil aki cu berdad a stroba Coastal di inverti 75 miyon dollar den un reefberth, tanki etc., pero a establece respet pa e sindicato, mediante nan lider Anselmo Pontilius. Personalmente mi tin cu reconoce cu aki a keda demostra cu sindicato tin su balor grandi.

E tempo pa exigi a pasa:
Mescos den varios conflicto cu e hotelnan, casinonan cu a base di ley tabata haya 10 aña di tax holiday y asina e 10 aña yega, sea nan ta bay bancarota of ta bende e propiedad, poniendo presion grandi riba gobierno cu si no duna nan tax holiday nobo nan lo cera, bay of e triki di bende e sharesnan y laga e doño nobo pidi atrobe tax holiday nobo of nan no ta tuma e trahadornan.

No mag lubida tampoco e periodo di Rudy Geerman cu a acumula masha hopi experiencia den negocia un gran cantidad di CAO. Segun mi FTA mester cuminsa prepara cu ya tin hotel cu ta habriendo e caha di triki di semper caba. Si mi analisa e situacion actual mi ta sinti falta di dirigentenan cu preparacionnan sindical adecuado cu ta fuerte, fastioso, pero responsabel di bringa pa e obrero sin ser usa politicamente a sabiendas cu tin cos cu por y tin cos cu no por, pasobra no tin placa!! E tempo pa exigi a pasa. Awor ta un tempo no solamente di entrega, pero cuanto hende lo por keda cu trabao.

Mester siña biba cu menos:
Un anotacion pa abo pensa como trahador. Tempo cu Lago a cera nos a perde 40% di nos GDP y bo a entrega 8.5% di bo salario y alabes paga pa yuda esunnan cu a keda sin trabao den sector priva 8.2% di Impuesto di solidaridad pa 2 aña cu a ser prolonga despues. Awor cu e pandemia mundial di Corona Virus Aruba ta esun cu segun estudionan di expertonan ta e isla den Caribe cu a haya e sla di mas duro, unda nos lo perde 80% di nos entradanan di turismo y tur negoshi relata na turismo cera, dirigentenan sindical por kere na 2020 cu 5% lo yuda scapa nos pais? No papia mi di bashi uitkering, gelijk bedrag, prima di vacacion etc. Ta cosnan cu den tempo bon tabata por, pero awor mi ta duda. Un biaha mas sindicatonan, boso responsabilidad ta tambe pa hende por keda cu trabao y no pa pone presion pa un grupo keda bon y otronan cu tambe ta trahador, esta 37000 ta keda sin nada. Ta nos tur mester siña biba cu menos, cada un na un manera responsabel. Dia no tin suficiente reservanan di divisa cu no ta drentando mas pa cubri importacion y ta ser ‘comi’ tur dia no tin pa ningun. Devaluacion lo ta un desaster pa nos tur y muy en particular pa e obrero. Ban yuda salba locual por ainda, apesar mi sa cu cada un lo tin su argumentonan pakico e no! Obreronan un biaha mas pabien. No rabia cu mi. Esaki ta un contribucion pa bo tambe pensa con serio cos ta den e pais aki.