E dianan aki tawata tin hopi incertidumbre y informacion saliendo tocante e presupuesto di parlamento pa loke ta COVID-19.
Mi persona como lider di fraccion di POR den parlamento ta hopi satisfecho, pa bisa cu despues di oranan largo deliberando y debatiendo di un manera constructivo cu diferente miembro di parlamento a logra formula y vota na fabor di e amienda pa asina entrega 25% di nos salario, incluyendo nos vakantieuitkering pa 2020.
Banda di esaki parlamento tambe a haci entrega adicional di mey miyon florin di presupuesto di parlamento. E suma aki ta bai wordo aloca na “Bureau Rampen Bestrijding” cu na e momentonan aki ta encarga cu e coordinacion di e maneho pa combati e efectonan di COVID-19.
Mi kier a duna danki na e medewerkers di parlamento y tur persona cu a aporta na un manera of otro. Di e forma aki nos a demostra cu ora ta bin na momento dificil di crisis, sin precedente, parlamento a bin hunto y tuma decision pa bienestar di full e pueblo.
Den momento nan di crisis ta momentonan cu mester bin hunto y cada persona segun nan responsabilidad mester contribui na e bienestar di cada un cu ta biba riba nos isla, den esaki tur persona, empresa, sindicato, gobierno, parlamento cada un di nos tin un rol den esaki.
E señal cu parlamento ta manda ta un señal naturalmente pa Hulanda, pa decisionnan cu tin cu wordo tuma den e conseho di minister di reino. Cu esaki demostrando cu Aruba den su totalidad ta realisa e magnitud di e crisis cu nos ta aden y cu nos tur por a yega na un reparticion husto di kico cada sector por entrega abase di e situacion cu nos ta aden na e momentonan aki.