Home Uncategorized COVID-19: Investigacion Chines ta haya evidencia cu e virus por keda den...

COVID-19: Investigacion Chines ta haya evidencia cu e virus por keda den aire pa algun oras

SHARE

Cientificonan Chines ta haya evidencia cu e coronavirus por keda ‘flota’ den aire pa algun ora. Nan Investigacion a determina tambe cu e gotas di e virus cu a cay riba e paña protectivo di personal medico por wordo ‘pusha bek’ den aire.

Investigadornan na China a examina con e virus a plama den 2 dos hospital na Wuhan. Nan a haya evidencia cu e brote por a wordo transmiti via aire. E investigacion haci a wordo publica e siman aki den e revista cientifico, Nature.

Nan a splica cu e transmision via e sistema respiratorio humano y contacto directo ta conoci caba. Pero cu e potencial pa transmision via contacto cu ‘aerosol’ ta poco comprondi. Pa mihor compronde e virus e cientificonan a colecta muestranan na diferente area na e dos hospitalnan na Wuhan.

Aki ta unda nan a haya indicacion cu algun gotas den aire ta contene e virus. E gotasnan aki ta 1/1000 parti di un duim (o inch), esaki tin potencial di keda den aire pa algun oras. Profesor di ingenieria na Virgina Tech, Linsey Marr (cual no a tuma parti di e investigacion), a papia cu New York Times dunando su punto di bista. Aki ta unda e a splica New York Times cu e evidencia aki ta sugeri un potencial di transmision aereo.

Marr ta splica si cu e presencia di e codigo genetico di e virus (COVID-19 RNA) den aire no kermen cu esaki ta infeccioso. E medidanan manera distanciamento social ta basa riba e hecho cu no ta kere cu e virus por wordo transmiti den aire. Si pensamento cuminsa cambia riba esaki, lo mas pais haye necesario y mandatorio pa persona bisti mondkapje pa asina preveni plamamento di e virus.

E investigadornan cu ta representa diferente universidad y laboratorio Chines a haya cu e concentracion di e virus den cambernan isola di pashent ta hopi abou pa motibo di bon ventilacion. Areanan sera, manera baño di pashent, ta unda presencia di e virus ta hopi mas.

E rapport a informa tambe cu nan a haya nivelnan halto di e virus na e areanan unda profesional medico ta kita nan paña protectivo. Esaki ta sugeri cu e gotas di e virus cu a cay riba e paña protectivo a wordo benta bek den aire momento cu e a wordo kita.

Investigadornan a sugeri cu factornan manera ventilacion, aire liber, desinfeccion di equipo medico (p.e. e paña protectivo), y desinfeccion di baño por reduci e concentracion di e virus den aire. E estudio aki ta un di mas recien pa sugeri cu e virus por wordo transmiti den aire.