Parlamentario Jennifer Arends-Reyes Apesar di crisis mester atende cu cuido di producto Aruba

Oranjestad: segun sra Arends-Reyes diamars mainta a tuma luga e continuacion di reunion publico di Parlamento pa trata presupuesto di Controlaria general y di Parlamento pero na mes momento atende e proposicionan pa reduccion salarial di Parlamentarionan pero no a logra yega na un acuerdo pa por a clausura e reunion.
“Pais Aruba ta pasando den momentonan sumamente dificil caminda entre otro por menciona e sector di turismo, caminda por a tuma nota cu ainda tin hopi pregunta riba e situacion actual y kico ta bay pasa.
Tin varios hotel cu ta purbando di prepara nan planan pa di e forma aki den e periodo nan dilanti, pa mira con nan lo reactiva nan servicio bek den e sector turistico.
Fuera di esaki tambe por a tuma nota di diferente ploegnan di trabou a wordo manda cas dor di gobierno, principalmente esunan encarga cu limpiesa y mantencion di matanan, caminda esaki ta notabel tur caminda mirando con matanan tur caminda ta den mal estado pa falta di cuido y mantencion.
Den diferente parti e sector turistico caminda ta necesario pa mantene e nivel di producto riba e nivel mas halto posibel, por mira un decadencia dor di situacion cu a surgi y esaki ta di lamenta ya cu na momento cu wak e producto Aruba, no por permiti e aspecto aki cay atras loke lo crea ainda mas presion na momento di reactiva e industria turistico.
Ta sumamente necesario pa tene na consideracion cu apesar di e situacion actual, Aruba su economia lo keda depende di turismo y na cualkier momento cu bay over na reactiva esaki, e calidad di e producto mester ta den su miho forma posibel.
Ta sumamente necesario tambe pa brinda atencion na mantene e producto ‘op en top’ cu tambe lo facilita ora cu e momento yega pa trahadonan den e sector turistico regresa nan trabou.
Lo ta na su lugar pa gobierno realisa e importancia di e proceso aki di mantencion di nos producto turistico y mas pronto posibel habri caminda pa trabou di cuido y mantencion di e lugarnan turistico, incluyendo nos cayanan principal como prome paso den e proceso pa reactiva turismo di nos pais.
Hotelnan ta preparando caba pa ora cu e momento yega caminda lo presenta e protocol pa reactivacion di nos turismo y di e forma aki tur hende traha hunto pa lanta e pilar economico aki bek den e forma mas rapido cu envolvimento di tur grupo concerni,” Parlamentario Jennifer Arends Reyes a declara.