Oranjestad – Pa celebra e di 50 aniversario di ‘Earth Day’, Aruba Tourism Authority (A.T.A.) a comparti via rednan social un video titula ‘Dushi Tera’ den nos mercado di Norte America. E video aki a wordo inspira pa un artista local, Kalina Croes. E video ‘Dushi Tera’ no ta solamente ilustra nos bunita paisahenan pa asina conmemora mama tera riba ‘Earth Day’, pero tambe ta enfoca riba bishitantenan nobo, como tambe nos bishitantenan fiel conoci como ‘returners/repeaters’. E video ta trece dilanti un mensahe di inspiracion yena cu amor y felicidad cu ta wordo transmiti pa medio di e bos di 17 Arubiano di diferente edad entre 9 te cu 90 aña.
E video “Dushi Tera” a destaca riba e website di e publicacion tan conoci di biahe ‘Travel + Leisure’, a menciona cu e unico cos cu bo mester pa por disfruta di Aruba su playanan bunita y e amabilidad di nos hendenan ta un coneccion di Wi-Fi. Ademas, e articulo tambe ta subraya e esfuersonan continuo di A.T.A. pa asina mantene nos isla den ‘Top of mind’. Esaki sigur ta noticia positivo cu ta importante pa trece dilanti, awor mas cu nunca, durante e temponan dificil cu nos isla y mundo henter ta enfrenta. Mester menciona cu e video a wordo mira y comparti riba diferente plataforma social, manera Facebook, Instagram , Twitter y tambe YouTube. Por remarca cu ‘Travel + Leisure’ tin un cantidad di mas di 3.5 miyon di siguidornan. E ‘post’ aki a alcansa mas di 106 mil persona y ya caba tin mas di 300 persona cu a ‘sign’ e promesa. Y mester menciona cu A.T.A. a haya e grato noticia cu e storia di Aruba ta den e top 10 storianan di mas popular riba e webiste di Travel + Leisure.
A haci uzo di e oportunidad aki pa motiva nos bishitantenan pa subi riba nos website pa asina forma parti di e #ArubaPromise. Di e forma aki, nos bishitantenan ta haci un promesa cu nan tambe lo yuda preserva nos dushi isla pa demas generacionnan por disfruta. Nos kier invita boso pa join nos y hasi bo promesa na https://www.aruba.com/us/aruba-promise
Un danki di curason ta bay pa tur esunnan cu a contribui cu nan tempo, pasion y compromiso pa cu e produccion aki y asina mustra mundo henter un tiki di nos dushi pais Aruba.