Home Politics Prome Minister Evelyn Wever-Croes: MENSAHE DI FELIZ CUMPLEAÑOS PA REY WILLEM ALEXANDER

Prome Minister Evelyn Wever-Croes: MENSAHE DI FELIZ CUMPLEAÑOS PA REY WILLEM ALEXANDER

SHARE


Rey ta reconoce trabou extraordinario di 17 ciudadano di Aruba

Dialuna 27 di april, tur e paisnan den Reino Hulandes ta celebra dia di rey. Nos ta conmemora e 54 aña di rey Willem Alexander. Prome Minister Evelyn Wever-Croes na e ocacion aki, a duna un discurso pa desde Aruba y den nomber di henter Aruba desea Rey Willem Alexander un feliz cumpleaño y hopi aña mas di bida y salud den compania di tur su sernan stima.

Prome Minister a mustra riba e hecho cu e celebracion di Dia di Rey e aña aki ta diferente. Normalmente na ocasion di Dia di Rey nos ta reconoce y premia ciudadanonan cu ta haci trabounan extraordinario y voluntario den nos comunidad. Y den nos comunidad na Aruba tin hopi hende ta haci trabou boluntario y extra ordinario. Hopi nos no sa mes di nan.

E aña aki Rey Willem Alexander a reconoce e trabou extraordinario di 17 ciudadano di Aruba, 6 como “Ridder in de Orde van Oranje Nassau” y 11 como ‘Lid in de orde van Oranje Nassau”.
E personanan aki a wordo proponi pa esnan cu sa di nan trabou boluntario. Nan a pasa den e procedura di evaluacion pa e organisacion Kapittel na Hulanda, y diabierna a ricibi un yamada personal di Gobernador di Aruba sr. Alfonso Boekhoudt informando nan di e reconocemento real.

“E otorgamento di e medaya di honor lo tuma luga un otro dia, despues di e crisis, pero di awor caba den nomber di Gobierno di Aruba, mi ta felicita cada un di boso cu e condecoracion real y mi ta gradici boso pa boso trabou boluntario y extraordinario den nos comunidad. Cu e reconocemento aki por inspira mas hende pa haci trabou boluntario y por inspira mas hende pa propone candidato pa condecoracion otro aña.

Mi por imaginami cu e ta un honor pa ricibi un condecoracion real. Y maske mi ta sigur cu ningun hende ta haci trabou boluntario pa haya un reconocemento, toch ta bunita ora cu un trabou extraordinario wordo reconoci.

Rey Willem Alexander, mescos cu su mama Prinses Beatrix, tin un luga special den su curason pa e islanan den Caribe, pa Aruba. E ta convivi cu nos den e crisis cu nos ta aden. Comprendible pasobra esaki ta e crisis mas severo cu a afecta tur parti di Reino seriamente. Ta momentonan manera esaki nos ta sinti e lasonan caluroso dentro di Reino, ora cu Hulanda como un di e prome nan a extende un man pa yuda nos. 3 siman pasa Hulanda a aproba un asistencia financiero di emergencia di 42.8 miyon florin como “zachte lening”, kiermen fiansa sin interes, dos siman pasa Hulanda a yuda Aruba cu 12 unidad di intensive care, siman pasa Hulanda a aproba ayudo humanitario di 32.5 miyon euro pa e islanan Aruba, Corsou y St. Maarten y e siman aki Conseho di Minister di Reino ta trata nos peticion pa ayudo di likides pa nos por cumpli cu e proyectonan di asistencia financiero na companianan y doño di trabou pa mantene trahadonan na trabou y na trahadonan cu asina mes perde trabou. Ademas lo trata nos peticion pa asistencia financiero.

Nos no sa ainda kico e virus aki kier siña nos, pero un sigur ta gradecimento, y nos ta hopi gradecido pa e ayudo aki.

Cada crisis ta trece cu n’e oportunidadnan y nos ta haciendo tur lo posibel, cu ayudo di Reino pa crea oportunidadnan nobo pa progreso y bienestar pa cada ciudadano di nos pais.

Den nomber di henter e pueblo di Aruba, nos ta desea Su Mahestad Rey Willen Alexander un feliz cumpleaño awe”.

“Ridder in de Orde van Oranje-Nassau”:
• Jacob Bult
• Peter Paul Michael Theodoor Hermans
• Imy Josephine Cecile Heinze-Lasten
• Alexander Maarten Nieuwmeyer
• Olga Josefina Buckley
• Jan Willem van Nes

“Lid in de Orde van Oranje-Nassau”:
• Sebastian Israel Falcon
• Elizabeth Phillis Craigg
• Reuben Laurence Craigg
• Maria Louisa Croes
• Rolando Juan Croes
• Edwardo Fernando de Graf
• Jacobo Dominico Henriquez
• Swinda Anastacia Thiel
• Elba Lucilda Hirschfeld-Smith
• George Jozef Geerman
• José Bernardino Andrade do Salâo