Mexico – Trahadornan di cuido medico, dokter y verpleegkundigen, ta wordo ataka pa miembronan den nan comunidad. Nan ta wordo saca for di bus, stroba di drenta nan cas, nenga servicio den supermercadonan y restaurant, y tambe violentamente ataka den publico.
E hechos nan aki ta motiva pa esnan cu miedo di COVID-19. Hendenan ta acusa e personal di cuido medico pa plama e virus. Por lo menos 21 profesional medico a wordo ataka den 12 estado Mexicano.
Hopi di e verpleegster nan ta conta cu nan semper a bisti nan uniform di trabou cu orguyo, pero awor tin miedo di bisti esaki den publico. Den mayoria parti di mundo hendenan den frontline di cuido medico den e pandemia aki a wordo considera como heroenan.
Esaki no a bay mescos na Mexico. Un specialista medico, dokter di garganta, nanishi y orea, a conta con e tawata canando bayendo cas despues di algun consulta cu e tawata tin mainta na hospital. E a scucha un hende yame, momento cu e a bira wak e a sinti algo muha na su cara.
Den algun seconde e a ripara ta bleach. Un persona desconoci a tira bleach den su cara y wowo. E dokter a splica con e kimico a tapa su bista. E dokter tawata den su uniform medico y lamentablemente esaki a hacie un blanco pa atake.
Asina tin hopi mas casonan di violencia contra esnan cu tur dia ta provee cuido pa otro persona. Personal di cuido medico a cuminsa roga e publico pa pensa bon kico nan ta haciendo.