Riba 26 di april na aña 1920, a nace riba nos isla un di e ciudadanonan cu mas impacto positivo y influencia tabata tin riba henter nos comunidad.
Su bida y creacionnan a sirbi como inspiracion pa hopi di nos y su herencia y legado lo sigui inspira e generacionnan cu lo sigui nos.
Como muestra di gratitud y tambe como un tributo special, Fundacion Go Cultura lo presenta diasabra 25 di april un homenahe y tributo na Sr. Padu Lampe, recordando e di 100 aña di su fecha natal.
E programa special aki lo cuminsa 9’or di anochi y lo por wordo disfruta tanto riba canalnan di television Telearuba y Canal 22 como riba plataforma social via paginanan: Padu Lampe, Go Cultura Foundation, Telearuba, Canal 22 Aruba, Cas di Cultura y Edjean Semeleer.
Durante e programa aki, e televidente lo sera conoci mas di serca cu e bida y generosidad di Padu. Tambe lo disfruta inmensamente di presentacion di un elenco fantastico di cantante, musico y poeta cu apesar di e situacion y circumstancia actual, a percura pa aporta na algo historico y asina special.
Fundacion Go Cultura ta gradici tur esnan cu ta dunando nan aporte pa haci e homenahe aki un realidad.
Sigur den temponan dificil y di incertidumbre, iniciativanan asina ta sirbi tambe como motivacion y inspiracion pa nos hendenan cu ta na cas, semper buscando algo positivo como inspiracion, entretenimento y distraccion.
Compania local DIGICEL tambe a expresa su orguyo inmenso pa brinda su aporte na un iniciativa asina importante, rindiendo honor na un gran arkitecto cultural.
Tur hende ta keda cordialmente invita pa disfruta di “Padu Eterno”, recordando 100 aña di nacemento di nos “Tata di Cultura” Sr. Juan Chabaya “Padu” Lampe.
