Presidente Donald Trump a sugeri posibilidad di ‘inyeccion’ di desinfectante den curpa di un persona infecta cu coronavirus. Esaki Trump a laga sa durante un conferencia di prensa di diahuebs.
Bill Bryan cu ta lidera Homeland Security su departmento di ciencia y tecnologia a duna palabra prome cu Presidente Trump a duna e remarke aki. Bryan a duna un presentacion di investigacion haci pa su equipo riba COVID-19.
E a splica cu COVID-19 no ta sobrevivi mucho largo den lugarnan mas cayente y humido. Tambe e miembro di Homeland Security a duna di conoce cu e virus ta seca basta lihe ora e ta den solo. Banda di esaki Bryan, a duna di conoce tambe cu desinfecta ta mata e virus dentro di 1 minuut.
Despues di e presentacion cortico aki, e Presidente di Merca a subi e podium dunando su comentario. Aki e mandatario di un di e paisnan mas poderoso na mundo a bisa si por check con por hinka un luz fuerte den curpa di hende. Splicando cu, segun e, esaki por wordo haci via e cuero pa asina combati coronavirus.
Presidente Trump a continua na sugeri cu mirando cu desinfectante ta mata e virus den 1 minuut, mester por wak si por traha un inyeccion asina. Segun e un inyeccion asina por haci pulmon limpi, e presidente no a specifica cual desinfectante e kermen.
Profesional medico, Dr. Vin Gupta, cual ta experto tambe riba pulmon y maneho di salubridad global a contraresta dibiaha e comentario haci pa Trump. Dr. Gupta a bisa cu ta un mensahe eroneo cu e ta dunando.
“E nocion di inyeccion o consumo di cualkier tipo di producto di limpiesa den e curpa ta iresponsabel y peligroso”.
Dr Gupta a continua na bisa “esaki ta un metodo comun cu hende ta uza pa mata nan curpa”. Oficial di Homeland Security a bisa nan laboratorio no ta considerando ningun di e ‘tratamento’ menciona pa Trump.
