Home Local Covid-19 no ta descrimina, taxistanan cu ta depende 100% riba e entrada...

Covid-19 no ta descrimina, taxistanan cu ta depende 100% riba e entrada di nan taxi, mas cu un luna na cas y sin cu placa ta drenta

SHARE

Taxista: “Ambtenaarnan at least di boso tin pa nan por kita di dje, anos ta na cas sin por cobra un cent”

Mientras algun sindicato ta den nan lucha pasobra nan no kier entrega 5% di nan salario y kier pa gobierno corta vet otro caminda, na Aruba tin un grupo hopi mas grandi di trahadornan cu ta pasando den momentonan hopi dificil, di preocupacion, di depression, momentonan hopi duro pa hopi famia.

Entre e grupo aki tin e taxistanan, algun cu nan casa ta trahando ainda of tin pensioen cu nan ainda un poco entrada, pero tambe tin un grupo di taxista cu ta depende solamente riba e entrada di nan taxi. E grupo aki ta na cas y NO tin placa y mucho menos no tin niun caminda pa haya tampoco. Un taxista cu ta pertenece na e grupo aki a bisanos, cu nan ta un di e promenan cu a bay cas y a keda sin entrada.
E taxista a sigui contanos cu tur cos a cuminsa dia 18 di maart ultimo, e la traha henter dia y a logra cera net 30 dollar pa gasolin. Pa su mayan dia 19 di maart e la bolbe bay purba su suerte, for di mainta te atardi tabata tin tres check out y e tres taxinan cu tabata prome cu ne a bay cu nan. E la keda henter dia sin haya un rit y a bay cas sin gana un cent.

E grupo di taxista aki mayoria lo mester a acudi na fase desk y a yena tur nan datonan caba y ta wardando, pero e 950 florin cu gobierno lo dunanan mas sigur lo bay mayoria parti pa cumpra lo mas esencial cu ta cuminda pa nan famia. E taxistanan aki tambe mescos cu ambtenaar y hopi otro trahador na Aruba, tin debe cu nan mester cumpli cu nan. Nan tambe tin auto, cas, WEB, ELMAR, SETAR pa paga y ta dolor pa mira nan taxi para na cas y no tin trabou pa por genera poco placa pa nan biba y mester depende si nan ta bin na remarca pa cobra e 950 florin.
Un taxista a contanos, cu e no por ni drumi anochi ora e pensa tur e cosnan cu e mester paga, su yiunan pa cria y sin entrada, e ta hopi preocupa si Fase desk enberdad lo yude cu 950 florin.

E taxista a bisanos tambe cu e ta haya dolor na su curason y ta haya e sindicatonan hopi gemeen cu nan ta haciendo tanto problema pa entrega un tiki so di nan salario pa yuda anan cu semper a traha duro, oranan largo, aportando na caha di gobiereno cu BBO y tur otro Belasting, nan tambe a coopera pa e ambtenaarnan por a cobra y haya tur nan previlegionan y awo ta parce cu lubida riba nan.

Segun nos a compronde e situacion di e taxistanan por lo pronto no lo bay drecha, paso e fronteranan lo keda cera te cu fin di Mei despues lo evalua si lo habri frontera o. Pero mientras tanto nan como taxista ta pasando den momentonan hopi hopi dificil.