ORANJESTAD – Como efecto di e situacion global di e COVID-19 Aruba Airport Authority N.V. (AAA) su Leadership Team a implementa varios medida operacional pa baha gasto pa adapta di forma liher na e situacion nobo. Pa di forma responsabel por garantisa e compania su continuidad y mas importante e mantencion di trabou di tur trahador, AAA a prepara un plan di 3 etapa pa delinea e medidanan pa baha gasto di personal necesario.
E compania ta actualmente den etapa 1. Algun elemento di e medidanan den etapa 1 ta entre otro cu e salarionan di e 10 miembronan di e Leadership Team, incluyendo e CEO lo wordo corta cu 10% y e incentivanan pa e miembronan di e Leadership Team lo wordo elimina desde 1 di Mei 2020. E medidanan aki ta wordo haci pa por mustra solidaridad cu tur empleado durante e temporada di insiguridad cu nos ta aden. Lo drenta etapa 2 y 3 si/ora cu e situacion actual y maneho responsabel ta rekeri e compania pa haci esei. E medidanan cu actualmente ta bou di consideracion pa wordo implementa den etapa 2 por inclui, pero no ta limita na un percentahe di salario cu lo wordo baha, menos ora di trabou pa tur hende y e eliminacion di cierto bonus. Den etapa 3 e medidanan di etapa 2 lo bira mas fuerte. E plan den e etapa aki ta refleha un plan responsabel pa e compania completo den e temporada cu hopi inseguridad actual.
“Como compania nos tambe tin cu enfrenta e consequencianan di e crisis mundial. Decisionnan responsabel y strategico ta esencial pa garantiza e continuidad di un compania. E compania ta aplica un guia principal importante den e proceso aki: purba mantene tur empleado den servicio contal cu esaki ta posibel y financieramente responsabel. Atrobe, mi kier gradici tur colega di AAA pa nan compromiso continuo y nan comprension pakico nos no tin otro opcion pa implementa e medidanan na e momentonan aki. Nos tur ta den e boto aki hunto” – Joost Meijs, CEO di AAA.