Home Uncategorized ‘Oracion no ta suficiente’. Dalai Lama ta splica cu nos mester bringa...

‘Oracion no ta suficiente’. Dalai Lama ta splica cu nos mester bringa Coronavirus cu compasion

SHARE

E siguiente ta un traduccion di un relato publica pa Dalai Lama den Time Magazine. 

Tin ora mi amigonan ta puntrami pa yuda cu cierto problema na mundo, usando algun ‘poder magico’. Ami semper ta bisa nan cu e Dalai Lama no tin ‘poder magico’. Si mi tawata tin, lo mi no sinti dolor den mi pianan o di garganta. Como humano nos tur ta mescos, y ta experiencia e mesun miedo, e mesun speransa, e mesun incertidumbrenan.

For di un perspectiva Budista, tur ser conoce sufrimento y e berdad di malesa, biehes y morto. Pero como ser humano, nos tin e capacidad pa uza nos mente pa domina rabia, panico y codicia. Den e ultimo añanan, mi a cuminsa stress ‘desarme emocional’ : pa asina purba di mira cosnan na un manera cla y realistico, sin confusion di miedo o rabia. Si e problema ta haya solucion, nos mester traha pa haye, si e no tin, nos no mester perde tempo pensando di dje. Nos como Budista ta kere cu mundo henter ta interdependiente. Pesey mi ta papia hopi di responsabilidad universal.

E brote di e teribel coronavirus aki a mustra nos cu locual pasa cu un persona por pronto afecta tur otro. Pero tambe e ta recorda nos cu un acto di compasion o un acto constructivo, manera trahando den hospital o simplemente mantene distanciamento social, tin e potencial di yuda hopi.

Desde cu e noticia a sali tocante e coronavirus na Wuhan, mi a cuminsa resa pa mi rumanan na China y otro parti mundo. Awor nos por mira cu niun hende ta immuun pa e virus. Nos tur ta preocupa pa nos sernan keri y e futuro, pa ambos e economia global y pa nos mesun hogar. Pero oracion no ta suficiente. E crisis a mustra cu nos tur mester tuma responsabilidad unda nos por. Nos mester combina e corahe demostra pa dokter y verpleegkundigen hunto cu investigacion cientifico pa bira e situacion aki bek y proteha nos futuro di mas menasa similar.

Den e tempo aki di gran miedo, e ta importante pa nos pensa riba e desafionan a largo plaso y e posibilidadnan pa mundo henter. Fotografia espacial di nos mundo ta mustra cu riba nos planeta blauw no tin ningun frontera. Pesey, nos tur mester cuid’e y traha pa preveni cambionan climatico y otro forsanan destructivo. E pandemia aki ta sirbi como un advertencia cu solamente door di bini hunto cu un reaccion global coordina por yega na topa e magnitud di desafio sin precedente cu nos ta enfrenta. Nos mester corda cu niun hende ta liber di sufrimento, y cu mester extende un man na otronan cu no tin hogar, e manera o famia pa proteha nan mes. E crisis aki ta mustra nos cu nos no ta separa di otro, hasta si nos ta bibando apart. Pesey, nos tur tin e responsabilidad di eherce compasion y yuda.

Como Budista, mi ta kere den e principio di cambio perpetuo. Eventualmente e virus lo pasa bay, mescos cu mi a mira guerranan y otro menasanan teribel den mi bida, y nos lo tin e oportunidad di construi nos comunidad global bek manera cu nos a haci tanto biaha caba prome. Ami sinceramente ta spera tur hende por keda safe y calmo. Den e tempo aki di incertidumbre, ta importante pa nos no perde speransa y confiansa den e esfuersonan constructivo cu otronan ta haciendo.