John G. Emanstraat, Oranjestad: Diaranson den oranan di anochi, un dama na un bushalte den John G. Emanstraat a hera bira victima di un asalto.
E dama tabata wardando bus, diripiente un homber a acerca e dama y a purba ranca su telefon for di dje. Pero ora e homber a ripara cu e no ta logra kita e telefon for di e dama, no a ked’e nada otro di core bay direccion pabou.
E dama a logra bati alarma, personal di CEA atento a mira banda di Corte di Husticia, un persona cu ta cuadra cu e descripcion cu e dama a caba di duna di su asaltante, mesora nan a bay p’e.
Mientrastanto polis a yega na e sitio y a tuma e homber aki over for di e personal di CEA. Despues cu polis a detene e sospechoso a bolbe pas’e pa personal di CEA pa nan transport’e pa Warda di Polis.
Polis a bay busca e dama na e bushalte, pero e no tabata tey mas, mas sigur bus a bin y ela bay, mirando cu e ora di Toque de queda tabata acercando. Polis a keda di tuma contacto cu e dama.
