E crisis di COVID-19 a trece cune medidanan necesario pa purba controla e cantidad di infeccion entre persona. Medidanan manera shelter in place, cuarentena y toque de queda tey pa proteha e comunidad contra e virus.
E situacion aki, aunke cu ta pa seguridad di e salubridad publico, ta trece cierto desafio cune. Personanan ta cera den nan hogar cu nan pareha. Unda cu antes por tawata tin cierto libertad di pasa oranan pafor di cas no tey mas.
E situacion di e crisis por causa (mas) tension entre persona.Tin relacionan unda cu prome di e crisis tawata tin elementonan di abuso caba presente y e situacion ta solamente fungi pa empeora esaki.
Tambe mester nota cu den e situacion dificil aki cu e tension actual por causa un surgimento di casonan nobo di abuso den relacionan cu antes no tawata tin esaki prome cu e crisis.
E tension y stress causa pa e crisis no ta kita e responsabilidad personal for di un persona cu ta scohe pa ta abusivo conta su pareha o famia. Abuso ta presenta den diferente forma. E por ta fisico, psicologico, financiero y/o sexual.
Fundacion pa Hende Muhe den Dificultad (FHMD) ta na altura di e efectonan cu e crisis aki por tin den hogarnan. Den un acto pa ta mas serca di esnan cu mester ayudo, a amplia nan disponibilidad.
Por tuma contacto cu e fundacion via messenger, WhatsApp y tambe telefonicamente. Sigui nan pagina di Facebook FHMD Fundacion pa Hende Muhe den Dificultad. Por yama nan na 5835400.
Por manda nan un mensahe riba WhatsApp tambe na 5671670. FHMD ta pidi pa manda nan un mensahe bisando ‘SOS + bo adres’ y nan lo percura pa provee bo cu e asistencia necesario.
Si abo o un persona bo conoce ta den un situacion abusivo na man di un pareha please tuma contacto cu FHMD. Den casonan di emergencia por yama Cuerpo Policial di Aruba na 100 pa asistencia.
