Caya Frere Theodorus, Paradijs: Diaranson mainta den careda di 7 or, presencia di polis a wordo pidi pa un persona cu no lo ta dunando señal di bida. Mesora a manda polis y ambulance na e cas aki.
Na yegada di polis y personal di ambulance no por a haci nada as pa e persona. Mesora a pidi pa presencia di un dokter pa constata morto.
Dokter Jones a yega na e sitio pa constata morto, pero mirando cu e persona lo tabata tin sintoma di coronavirus a opta pa haci un test prome cu duna permiso pa lanta e curpa. Mesora DVG a wordo avisa y nan a bin cu e testnan pa haci esaki.
Mientrastanto auto di morto a yega pa busca e curpa, pero nan mester a warda te ora cu nan a caba di haci e test cu e curpa.
E personal di Aurora Funeral Home tabata completamente bisti pa protega nan mes, pa si acaso e defunto lo por tabata tin e virus. Despues cu Dokter a caba di constata morto, e auto di morto a hiba e curpa.
E persona cu a fayece na bida tabata yama Pedro Danje di 39 aña, cariñosamente yama Moti. Moti tabata un persona special, hopi stima den su famia y su bario.
Arubanative.com ta extende su mas profundo palabra di condolencia na famia y amigonan di Moti, cu moti sosega na paz.
