Den un reportahe publica den e revista Science, cientificonan a conclui cu varios periodo di lockdown ta necesario pa trece e pandemia bou control. Ta premira cu medidanan manera distanciamento social lo mester bin na vigor varios biaha den e añas venidero.
Den un otro scenario ta papia cu ta premira cu COVID-19 lo keda surgi varios biaha, esaki te cu aña 2025 tanten cu no tin un vacuna o tratamento medico efectivo.
Un di e autornan di e estudio aki, Marc Lipsitch, profesor di epidemiologia na Harvard a splica “tin dos cos: hendenan infecta y hendenan susceptible. Acaso por tawata tin un cantidad enorme di hendenan cu tin inmunidad cu nos no tawata sa di dje …mayoria di e poblacion ta keda susceptible. Premirando cu e pandemia ta yega su final den zomer [di 2020] no ta consistente cu locual nos sa di e plamamento di e infeccion.”
E reportahe aki ta reinforsa e pensamento entre cientificonan cu distanciamento social (y lockdown) mester keda na vigor pa un temporada mas largo. Esaki ta permiti cu e cantidad di casonan den hospitalnan no ta surpasa e capacidad cu nan tin.
Tin tambe un otro investigacion haci, esaki pa e gobierno di Reino Uni su grupo di consehero cientifico pa emergencia. Desde maart caba e pais tawata na altura cu nan lo mester anda cu diferente periodo di distanciamento fisico.
Pues paisnan lo mester atende cu diferente ‘ola’ di infeccion COVID-19 mirando cu no tin vacuna o tratamento medico efectivo ainda. Pa es motibo, autornan di e investigacion ta splica cu vigilancia y periodonan di distanciamento mester keda manteni te 2022.
Investigacionan riba inmunidad despues di infeccion di COVID-19 ta den proceso. Ainda tin hopi pregunta riba esaki. No por bisa cu inmunidad ta permanente o si ta solamente pa un temporada. Investigacionan haci riba e populacion cu tin e anticurpanan (antibodies) protectivo ta crucial den determina si tin inmunidad di un duracion mas largo of no.
Profesor Marion Koopmans, cabesante di e programa di virologia na Erasmus Universiteit, a indica cu lo no ta usual pa tin completo y permanente inmunidad pa locual ta un virus respiratorio.