Home » Historia di Aruba: Tanki di Azeta (Fuel oil) a pega candela y a explota na W.E.B.

Historia di Aruba: Tanki di Azeta (Fuel oil) a pega candela y a explota na W.E.B.

by Admin
0 comment 171 views

Na Aruba nos por djis habri cranchi y bebe awa, WEB semper a produci un di e miho awa di cranchi na mundo y ta produci coriente tambe pa henter nos isla.

Tur caminda unda tin hende ta traha por pasa accident, cu resultado serio of tin ora cu poco suerte cu un resultado menos serio.

 

 


                                                                                              W.E.B. antes

 

E biaha aki nos lo dedica e parti di historia di Aruba na un candela feros na WEB, cu a sosode riba Diamars 8 di maart 1977.

Un dia manera tur dia, trabounan semper tabata tin, tin y lo tin ta andando na WEB pa produci awa pa henter Aruba.

BALASHI: Diamars den careda di 2’or y mey di merdia tres trahado a bay haci algun trabou di welder na e pipa di un tanki di azeta (fuel oil).
E tanki aki normalmente ta carga 8 mil ton di azeta y e dia aki e tabata como tres cuart yen. Mientras nan tabata welder un chispa a bula y a cende mesora un candela den e tanki di azeta aki.


weldermento di pipa

Mesora a bati alarma, pero un groot alarm, pa motibo cu ta trata di un candela riba un tanki di azeta (fuel oil). Mesora varios unidad di brandweer di Aruba a sali di kazerne bay direccion di WEB, tambe a pidi asistencia di brandweer di LAGO mirando cu e candela tabata hopi peligroso y tabata teme pa lo peor.

Brandweer cu Polis a yega hopi lihe na e sitio

Den menos cu 15 minuut brandweer di Aruba y di LAGO a presenta y mesora a cuminsa cu e trabou di domina e candela pa e no expande. Varios unidad di polis tambe a presenta riba e tereno di WEB. Mirando e peliger, polis mesora a opta pa cera e caminda dilanti di WEB pa trafico. For di leu por a mira hopi huma saliendo for di riba e tanki.

 

 

Maske tabata teme pa un explosion, asina mes tres persona cu curason grandi y cu hopi curashi a dicidi di subi riba e tanki aki, pa asina dirigi e bomberonan unda nan mester spuit awa pa tene e tanki friu mientras tabata wardando riba e truck di brandweer carga cu foam. E tres personanan tabata Chin Harms, Fire Chief di Brandweer di LAGO, acompaña pa recherche Paskel y Mr. Buurman di WEB.

 


Chin Harms, Recherche Paskel y Buurman riba e tanki ta dirigiendo e bomberonan unda pa spuit awa

Na momento cu e truck di Foam a yega a mescla esaki cu awa y a cuminsa spuit e tanki. Aparentemente esaki y e azeta cayente a forma un steam, e pression a bira dimas y e tanki a explota, causando cu e parti ariba di e tanki a scheur,  hopi azeta a cuminsa spuit for di ariba e tanki, esaki a sosode net na momento cu e tres personanan cu tabata riba e tanki tabata bahando for di e tanki, cu consecuencia cu tur tres a haya un baño di pia te cabes di azeta.


Despues di e explosion e parti ariba di e tanki a scheur y a spuit un gran cantidad di azeta.

Director di WEB di e tempo ey, Sr. Chenco Yarzagaray tambe a yega na e sitio y e la splica cu normalmente e azeta aki su temperatura ta entre 120 pa 130 grado Celcius.

 

Na momento cu e tres personanan tabata baña na azeta

 

E tres personanan cu a haya e baño di azeta tabata tin hopi suerte, paso e awa cu scuma cu a spuit a fria e azeta y nan no kima. Tur tres a wordo transporta pa hospital pa observacion.


E azeta a spuit susha un truck nobo di WEB cu tabata para poco cerca.

E azeta a spuit cu hopi forsa for di riba e tanki y a susha e switchyard di 60 mil volt, mesora a opta pa kita coriente di e switchyard pa haci esaki mesora limpi.

E candela a keda completamente combati bou mando di Ing. J. Lopez, kende e tempo ey tabata opperbrandmeester, hunto cu e brandweer di LAGO, bou mando di Fire Chief di e tempo ey Chin Harms.

Na e sitio tabata presente e hefe interino di W.E.B., Ing. Oei,  kende na prome instante cu e la wordo avisa di e candela, e la tuma contacto di biaha cu Polis y tambe mesora a pidi asistencia di brandweer di LAGO.

Comisario Interino di Polis di e tempo ey Sr. Remie Zaandam, Officier van Justitie di e tempo ey mr. Arps  y tambe Deputado Ing. Roland Lacle kende tabata e deputado di WEB e momento ey, tambe a presenta hopi liher na e sitio y tabata papiando cu autoridadnan.


Diputado di e tempo ey di WEB, Ing. Roland Lacle papiando cu autoridad presente na e sitio

Despues cu e candela a keda domina y combati, brandweer a keda na e sitio pa cada rato muha e tanki y a keda standby te pa su mayan mainta 8’or. Un gran parti di Aruba a keda te den oranan di anochi sin coriente, pa motibo cu trabounan di limpiesa riba e switchyard mester a tuma lugar.

E azeta cu tabata tin ainda den e tanki a wordo gepomp di biaha pa un otro tanki, pa asina evita cu e bira duro y no lo sirbi mas.
E tanki a wordo saca for di servicio, pa limpiesa y despues lo mester a drecha esaki pa e lo por wordo uza back.

Varios Fuente entre otro: Amigoe di Curacao/Prome

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio