Home » Hendrik Tevreden: CITGO ARUBA NO POR A CUMPLI DI 2016, Y NO LO POR CUMPLI PA FUTURO

Hendrik Tevreden: CITGO ARUBA NO POR A CUMPLI DI 2016, Y NO LO POR CUMPLI PA FUTURO

by Admin
0 comment 67 views

Parlamentario Hendrik Tevreden (MEP): CITGO ARUBA NO POR A CUMPLI DI 2016, Y NO LO POR CUMPLI PA FUTURO

E realidad di full e situacion rond di CITGO ta cu e compania ta absoluto y no tin forma pa paga nada mas. No ta solamente un situacion cu ta pasando cu Aruba pero nan fondonan rond mundo ta congela, sin kita afor cu hopi di su funcionarionan a wordo sera pa motibonan di fraude. Ademas e realidad amargo di e situacion na pais Venezuela ainda no a mehora, cual tambe ta haci hopi dificil pa por haña fondo pa nan cumpli cu e contracto y nan obligacionnan.
Peor ainda momento cu OFAC (Office Foreign Assets Control di USA) a pone sancion riba nan, a haci dificil pa nan yega na fondonan. Tur esakinan a afecta e rehabilitacion di e refineria na Aruba for di 2016 y ta rason cu pa cuater aña Aruba no a mira trabou na gran escala tuma lugar.

For di prome kwartal di 2019 CITGO a informa gobierno cu nan no por cumpli mas cu nan obligacionnan y kier yega na un ‘Temporary Suspension and Transfer Agreement’. Na mesa no a logra sali afor y a bay over na un ‘Termination Agreement’.
Gobierno a forsa CITGO pa cumpli cu tur su empleadonan segun ley y tambe cu belasting unda a paga 28.8 miyon. Sumando cu CITGO no a opera den e 4 añanan cu a pasa, no por paga lease na RDA, y no por renoba e planta, e pregunta ta keda, kiko ta warda pa termina anto?

CONTRACTO FIRMA PA EMAN Y DE MEZA
Bou di gabinete Eman ariba 10 di juni 2016 a firma cu Nelson Martinez cu ta representa Citgo Aruba Holding, Citgo Aruba Refinery y Citgo Aruba Terminal. Un combenio unda PDV Holding a duna: 1) Un suma di 150 miyon dollar pa ora di desmantelacion, 2) A elimina claim ambiental (AB 2016/50) di Coastal, El Paso y Valero desde 1989 te cu 2016, 3) A duna garantia pa cualkier incumplimento di banda di RDA na CITGO, CITGO lo por claim Pais Aruba te cu 300 miyon dollar Un contract cu a pone Pais Aruba den un desventaha grandi y a pone Aruba den un riesgo hopi grandi.

COVID 19
Si Aruba no yega na e ‘Termination Agreement’ awor, ta keda un inseguridad hopi grandi y riesgoso. Pesey ta importante pa splica e incertidumbre tocante e 150 miyon dollar di garantia cu PDV Holding a duna. E suma aki no ta cu PDV Holding lo paga Pais Aruba si tin un incumplimento di contract. Tampoco no ta un suma cu nan ta debe Pais Aruba. Solamente si CITGO no cumpli cu su obligacionnan y si Aruba haya rason den corte internacional lo tin un posibilidad ariba e 150 miyon dollar. E proceso aki lo por dura alrededor di 5 aña, sin cu tin un garantia cu lo cobra e suma di 150 miyon dollar na final debi na e tantisimo sancionnan cu tin riba CITGO y PDV Holding.

Mirando cu Aruba ta depende di turismo solamente te cu awor y cu e crisis mundial di Covid-19 ta funeste pa Aruba, ta prudente pa e refineria y of terminal haya un operador nobo y habri mas pronto posibel pa asina por tin un segundo pilar economico pa yuda saca nos Pais di e crisis aki y pa nos por tene cabes riba awa te ora cu turismo lanta cabes mundialmente.

DIRECCION NOBO
Nos por drenta e direccion nobo solamente cu un vision nobo. Nos tin di termina e contracto actual cu CITGO pa por yega eynan. Nos tin di haya e facilidad mas liher posibel pa evita cu e refineria ta ta sigi deteriora y bai perdi. Aruba tin di recupera e control ariba su tankinan di terminal. Y habri negosacionnan cu otro interesadonan pa por yega na haya un operador nobo.
Esaki lo por mustra awe cu nos ta perde, pero futuro lo mustra cu esakinan ta e pasonan cu lo hiba Aruba pa gana, parlamentario Tevreden a declara.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio