Home » Di 22 pa 34 unidad cla pa trata pashentnan cu Coronavirus HOSPITAL ORGUYOSO DI CAPACIDAD ADICIONAL PA ICU 

Di 22 pa 34 unidad cla pa trata pashentnan cu Coronavirus HOSPITAL ORGUYOSO DI CAPACIDAD ADICIONAL PA ICU 

by Admin
0 comment 67 views

 

Tabata un momento di orguyo y un sentido di trankilidad bou di e directiva y personal di Dr. Horacio E. Oduber Hospital, ora mira con ta baha carga conteniendo mashinnan pa hala rosea, tubonan y hermentnan medico pa por maneha un camber di Cuido Intensivo (ICU). Awor aki caba tin capacidad extra, pero Aruba kier ta sigur di ta bon prepara den caso cu mester atende grupo grandi di pashentnan malo cu reto pa hala rosea den ICU den cuadro di Coronavirus. 

Freek Korver, Presidente di Hunta di Directiva di Hospital, representante di Gobierno y DVG, algun miembro di staf y personal di HOH tabatey personalmente pa acepta e cargamento aki na Hospital diasabra atardi. El a splica cu ya caba tabatin 22 unidad di ICU den operacion, cu ta ekivalente na proporcion, cu 2500 unidad na Hulanda. Esey ta mas cu tres biaha e capacidad normal cu semper tabatin na Aruba, cu tabata 6 unidad. 

“Nos ta hopi gradici na Gobierno di Hulanda pa e donacion aki pa reforsa cuido den Caribe Hulandes den caso cu e cantidad di pashent di Coronavirus aumenta. Nan a manda 30 unidad pa Caribe Hulandes, di cual 12 pa Aruba, 12 pa Corsou y 6 pa Boneiro. Esaki ta hiba Aruba na un siguiente nivel den capacidad adicional pa por cuida pashentnan cu problema di halamento di rosea”, asina Freek Korver a enfatisa. 

Claro cu Hospital ta convenci cu, e determinacion di comunidad di Aruba pa keda cas y evita mas plamamento di e virus, cu Hospital no lo mester uza e unidadnan ey mes. Nan lo tey den un forma preventivo, si acaso Aruba haya un brote di cual hopi hende haya sintomanan pisa cu complicacionnan serio pa motibo di Coronavirus. 

Dr. Horacio E. Oduber Hospital ta conta cu mas o menos mil empleado, cu na un forma profesional y dedica, ta brinda cuido na tur e pashentnan cu diariamente ta bishita Hospital sea pa tratamento di un rato of cu mester keda interna pa mas largo. Ultimo luna tur funcion den Hospital a traha extra duro di un forma preventivo pa asina tin suficiente material, protocolnan a ser traha pa tur hende ta riba mesun liña, trainingnan a ser duna y mucho mas pa asina si mester yega asina leu por brinda e cuido necesario na tur pashent. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio