ORANJESTAD, Aruba: Premirando e weekend di Pasco Grandi y dialuna di Resureccion unda nos comunidad tin e custumber di festeha esaki engrande. Gobierno di Aruba a trece diferente cambio pa evita aglomeracion di hende pa asina evita cu e virus di COVID-19 por plama rapidamente bou di nos comunidad.
E cambionan implementa riba diabierna, diadomingo y dialuna ta ensera cu tur localidad comercial ta sera. Tin exepcion solamente pa botica, dr di cas na warda, station di gasoline cu lo ta habri di 7am-7pm, drive thru- take away y delivery di cuminda por ta habri di 11am-7pm. Parti anochi “Toque de queda” no tin cambio, eta keda vigente di 9pm-6am.
Pa loke ta ehercicio esaki por sigui tuma luga, basta cu ta tene cuenta cu samenscholingsverbod. Esaki ta significa cu ora di haci ehercicio of transita no ta permiti pa ta mas cu 3 hende na mes momento. Pa cu esaki no tin exepcion.
Esnan cu mester bay lama pa landa pa nan salud, por haci esaki pero no ta permiti pa keda recrea na lama. Tampoco por ta mas cu 3 hende hunto.
Riba lama tampoco ta permiti recrea. Botonan di placer, wave runner ni ningun mechanismo of obheto di placer por ta riba lama ni tampoco boto di pesca. E pasonan aki ta necesario pa seguridad y bienestar di un y tur.