Home Politics Registracion pa Regreso Boluntario a inicia Minister di Husticia, mr Andin Bikker,...

Registracion pa Regreso Boluntario a inicia Minister di Husticia, mr Andin Bikker, a anuncia recientemente cu e ta start cu fase 1 di e programa di Regreso Boluntario pa migrantenan.

SHARE

Kico e programa di Regreso Boluntario pa migrantenan ta encera?
E programa di regreso boluntario ta dirigi riba e migrante cu ta aki y cu pa motibonan pafor di su alcance, no por a regresa su pais di origen (ainda) of e migrante cu ta aki na Aruba – sea cu e ta regular of no – y tin e intencion di bandona Aruba boluntariamente pa bay residencia su mes bek na su pais di origen.

Den e promer fase di e programa di Regreso Boluntario, kier efectua na un forma ordena, humano y eficiente, un inventarisacion di e interes bou migrantenan pa haya asistencia pa un repatriacion boluntario pa e pais di origen. Posteriormente ta inicia e proceso pa asisti migrantenan cu a registra y pues a indica cu nan tin e deseo pa no keda mas na Aruba, y cu kier bay bek nan pais di origen a base boluntario, cu e parti logistico y si ta necesario, tambe facilita cu e transportacion.

Kendenan ta bin na remarke pa un Regreso Boluntario?
Migrantenan cu un status legal of sin un status legal cu ta desea di regresa nan pais di origen, y no por efectua esaki dor di falta di recurso, por awor procede pa registra y di e manera aki aplica pa forma parti di programa di Regreso Boluntario cu asistencia. E proyecto di Regreso Boluntario tin como meta y ta dirigi riba e grupo mixto di migrante cu ta actualmente na Aruba dor di diferente motibo y/of circumstancianan y kier bay nan pais di origen. E grupo di enfoke por ta migrantenan cu un status legal y migrantenan sin un status legal, cu ta desea di haya un asistencia pa por regresa nan pais di origen a base boluntario.

Con of unda e persona por registra pa bin na remarke pa e Regreso Boluntario asisti?
Teniendo cuenta cu e medidanan vigente pa cu mitigacion di e COVID19, y e recomendacion pa tene distanciamento social, a opta pa crea un formulario digital pa administra e registracion di tur persona cu ta desea di haci uzo di e programa di Regreso Boluntario.
E formulario online pa registracion ta disponibel riba e siguiente website:
www.dimasaruba.aw
Una bes cu e persona ta riba e website ariba menciona,
1) e persona ta selecta e idioma, y despues
2) e ta click riba e tab of link di Regreso Voluntario / Voluntary Return / Vrijwillige Terugkeer.
3) Na momento cu habri e link, e persona lo por siguientemente yena digitalmente tur su datosnan personal y tambe di contacto.
4) Y ta finalisa bo registracion dor di emiti esaki digitalmente

Hotline pa informacion riba programa Regreso Boluntario.
Si un interesado mester di guia of tin mester di mas informacion yama e call center di Programa di Regreso Boluntario na siguiente hotline: 2811010 for di 9or di mainta pa 4or di atardi durante dianan di laboral.
Te ki dia por registra pa e programa di Regreso Boluntario ?
E programa di Regreso Boluntario Asisti pa migrantenan ta vigente pa un tempo defini y ta habri – inicialmente – te cu fin di luna di april 2020.
Pa es motibo ta pidi tur esnan interesa, pa registra mas pronto cu ta posibel online.
Kico por spera despues di cu a registra pa e programa di Regreso Boluntario (fase 2)?
Despues cu keda cla cu e fase inicial di registracion y inventarisacion den luna di april 2020, lo sigui e fase 2.
Ta e intencion pa planea e buelonan a base di e registracion y inventarisacion den fase 2.
Mas informacion di e fecha(nan) lo sigui na su debido tempo. E ta importante p ata pendiente di bo email (fase 2).
Den e temporada aki cu e fronteranan ta cera pa motibo di COVID19, e ta rekeri un intervencion(nan) na nivel diplomatico pa yega na palabracionnan necesario (bilateral) e respectivo paisnan for di cual Aruba tin imigrantenan cu interes pa bolbe nan pais di origen pa por yega na protocolnan conhuntamente riba e repatriacion. 3

Kico ta e rekisitonan cu lo mester cumpli cu ne?
E rekisitonan pa e programa di regreso boluntario ta:
– Documento di biahe valido (of un documento di biahe cu a caduca, pero cu ainda ta ser acepta dor di autoridadnan di e pais di origen);
– Comprobante cu no por (ni tin garante cu lo mester) cubri e gastonan relaciona cu e repatriacion;
– Formulario firma cu e interes di regreso boluntario;
– Den caso cu tin un aplicacion pa asilo ainda canando, adicional un carta firma unda ta retracta e aplicacion concerni;
– Den caso cu tin overstay: lo tin tambe mester tene na cuenta cu lo tin un periodo (di maximo 18 luna) acopla na e repatriacion dentro di cual e persona no por bolbe Aruba.

Programa di Repartriacion cu sosten.
E programa di Regreso Boluntario aki di Minister di Husticia no lo ta posibel sin e sosten di partnersnan strategico, entre otro Ministerio di Husticia y Siguridad di Hulanda.
Di es manera aki ta duna oido y sosten na tur esnan cu ta desea di regresa bek nan pais di origen di un forma boluntario, y no por haci esaki riba mesun forza. Y alabes a aporta na e mantencion di orden publico y siguridad di nos pais.
E interes pa e programa di Regreso Boluntario cu a anuncia pa realisa e repartriacion di migrantenan, ya ta conta cu bastante interes y sosten.
Pa es motibo ta pidi tur esnan interesa pa registra mas pronto cu ta posibel, y yena e formulario online disponibel riba e siguiente website: www.dimasaruba.aw, pa asina Gobierno por tin un mihor bista di e candidad di personanan cu tin interes den e programa di Regreso Boluntario.