Home » Parlamentario Alan Howell (POR) “Beter een vogel in de hand dan 10 in de lucht”

Parlamentario Alan Howell (POR) “Beter een vogel in de hand dan 10 in de lucht”

by Admin
0 comment 92 views

Parlamentario Alan Howell durante reunion publico a uza un expresion na Hulandes cu nos tur a siña na scol ‘beter een vogel in de hand dan 10 in de lucht’. Esaki tabata su forma pa expresa su opinion riba e terminacion di e contract cu Citgo.
E ta bisa cu nos tin un shot pa termina e acuerdo aki y haya por lo menos 16 miyon of di otro banda bay caminda di arbitrahe pa mas o menos 5 aña y wak kico nos ta haya, si logra haya. Si sigui e caminda di arbitrahe pa tur e añanan ey, San Nicolas lo sigui sangra, nos pueblo lo sigui sangra.
Howell ta bisa cu nos tin e opcion di bisa e personanan aki pa coy nan maleta y bay y habri e opcion pa otro compania drenta y yena nos tankinan bashi y haya di e forma aki sikiera un cachi cachi.
“Mi hendenan di Aruba y specialmente di pariba di brug ta anhela pa mira movecion, pa mira pan riba nan mesa. Loke pueblo kier sa ta con e gobierno aki ta bay tin creatividad pa trece pan riba nan mesa y no kico e contract ta bisa of cua partido tin of no rason. Pa tal motibo ta urgi gobierno pa haci lo posibel pa termina e acuerdo aki, gradici Citgo pa e mal experiencia y hala kita. Nos tin cu sigui bay dilanti”, parlamentario di POR a expresa.
Den e cuadro aki e tabatin algun pregunta pa gobierno:
Ki siguransa tin cu lo habri e refineria un biaha mas? Si no bay over na refineria ki otro opcion gobierno ta premira? Lo tin interesado pa otro opcion pa e tereno aki?
16n miyon lo bay destina na kico? Cu terminacion di acuerdo cu Citgo, gobierno lo por sigura esnan di pariba di brug cu lo trece trabou? Cuanto tanki bashi tin? Cuanto ta den bon condicion y cuanto den mal condicion? Ken mester drecha e tankinan? E lo trece trabou pa nos hendenan? Tin hende interesa den e terminal y si ta si cuanto nan ta?
Concluyendo Alan Howell a expresa cu el lo duna tur su contribucion na yuda Aruba bay dilanti. “Pueblo ta interesa pa sa kico lo pasa, con ta bay desaroya pariba. Pueblo kier siguransa cu gobierno ta bay garantisa cu lo tin luz den horizonte. No por sigui wak den un direccion so. Tin diferente alternativa cu no ta solamente refineria y si por haya desaroyonan cu por trece pan riba mesa mi lo sostene esakinan”.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio