E partido politico BIJ1 a ser funda na aña 2016 pa presentador di television Sylvana Simons. E partido a wordo estableci abase di e principionan di igualdad radical y husticia economico.
E partido politico Hulandes, BIJ1, lidera pa Sra. Sylvana Simons ta haciendo un suplica na Hulanda. Su partido ta pidiendo pa duna mihor y igual trato na e residentenan di e parti Caribense di Reino, en particular awor cu ta pasando den e pandemia di COVID-19.
Politico Simons ta pidiendo Gobierno Hulandes pa tuma responsabilidad den Reino Hulandes pa ofrece ayudo na e islanan cu ta sufriendo pa motibo di e crisis. Aunke Minister Knops (CDA) di asunto di reino
a priminti cu e islanan por conta riba nan partner Europeo, otro partidonan (SP y VVD) kier preveni esaki.
Partido VVD kier impone den e momento aki di crisis mas supervision financiero riba e islanan di Aruba, Curaçao y Sint Maarten. Esaki en cambio di ayudo humanitario ta un intento di reduci autonomia di e islanan, segun partido BIJ1.
Lider di e partido ta laga sa cu “gobierno Hulandes a neglisha su responsabilidad pa locual ta e parti Caribense di Reino pa añas y awor kier hasta presenta demandanan en cambio di sosten durante e coronavirus crisis.”
Sint Maarten ainda ta recuperando di e desaster laga atras pa horcan Irma. E ayudo financiero priminti no a wordo ricibi completamente. E construccion cu mester a wordo haci ainda no ta cla. E hecho aki a afecta e pais su capacidad di su infrastructura medico.
Sint Maarten tin 37 caso registra di e virus y 6 morto. Cuido medico ta bou di un presion inmenso. Banda di esaki Aruba y Curaçao lo sufri di e consequencianan economico tambe mirando cu no tin turismo. Activista, artista y sostenedor di e partido BIJ1, Quinsy Gario, a splica cu “E islanan mester wordo considera igual. Solidaridad lo salba bida. Ta tempo pa actua liher y sin ningun prehuicio.”
E partido di BIJ1 a haci un conexion entre e trato di e estado Hulandes pa cu e islanan y neocolonialismo. Aki Den Haag ta involucra su mes den asuntonan interno mientras e ta ignora e realisacion di derechonan humano pa cu e parti Caribense di Reino.
Activista Gario ta sigui splica cu “Ningun hende mester wordo trata como ciudadano di segunda clase. BIJ1 ta para pa autodeterminacion, husticia y igualdad den Reino. Na Hulanda nos lo sigui pusha pa solidaridad y demanda cu nos rumanan Caribense wordo trata cu respet.”
