Venezuela tin actualmente 165 caso registra di e virus y 7 morto. E pais ya pa algun aña ta den un crisis social, economico y politico. E virus di COVID-19 por ta potencialmente devastador pa locual a resta di e pais su cuido medico. Hospitalnan ya caba falta awa, coriente y equipo medico pa atende cu pashent.
Mientras cu otro Venezolanonan tawata en busca di proteccion contra COVID-19, yiunan di e miembronan mas rico y conecta politicamente di Venezuela a sigi fiesta. E yuinan di e elite ta wordo yama hopi vez pa ‘Bolichicos’.
E pais unda cu 5 miyon persona a haya nan ta emigra, unda no tin suficiente cuminda o medicina ta hogar pa un grupito di hendenan rico. E yiunan di e elite no ta laga e situacion di e pais o e virus stop nan di fiesta.
Actualmente esnan den e ‘inner circle’ politico di Maduro ta bou restriccion di biahe y tin sancion riba nan cuentanan bancario. Como cu no por biaha, e hobenan a dicidi di organisa un fiesta di varios dia na e archipiélago Los Roques. Esaki ta un paraiso pa e poco cu por ‘afford’ e.
E fiesta a wordo organisa na maart pa algun negociante cu tin lasonan cu gobierno Venezolano. E fiesta a wordo organisa sabiendo cu tin un virus, y cu aglomeracion di persona ta peligroso. Entre e grupo di elite cu a bay fiesta, tawata tin algun cantante di reggeaton y Jesús Amoroso, yiu di Presidente Maduro su top oficial pa asuntonan anti-corupcion.
Jesus Amoroso
Dos persona cu kier keda anonimo a informa prensa cu varios muher Venezolano biba afor a biaha di Madrid y Londres, algun di e lugarnan mas afecta di e virus, pa asisti e fiesta. (Esaki prome cu fronteranan a sera.) Hendenan a biaha cu avion priva pa bay e fiesta, unda cu arma, droga y prostitucion tambe ta invita.
Aki e aglomeracion di persona a causa cu e virus a plama rapidamente entre nan. Mucho informacion no tin, pero ta ser bisa cu tur esnan cu a asisti e fiesta mester a wordo getest. A constata cu practicamente tur a keda infecta.
Informacion di ken tur tawata presente pa e acto iresponsabel aki no ta conoci. Pueblo Venezolano cu tin simanan largo sera na cas pa nan mesun proteccion ta condena locual e grupo aki a haci. Presidente Maduro en cambio ta defende e acto bisando cu ya “pakico critica un fiesta?” y cu “nan no tawata sa cu nan ta malo”.
Miguel Rengifo, taxista residencia na Caracas, ta rabia cu e riconan di e pais ta haci fiesta mientras tin un lockdown. Rengifo a continua na bisa cu aki “…nos ta djies luchando pa sobrevivi”. Na diferente pais esnan mas rico a sigui biaha y fiesta te unda nan por. Asina exponiendo nan mes na e virus sin tene na cuenta otro hende.
E indiferencia y falta di solidaridad cu e personanan aki ta mustra otro, ta pa motibo cu esnan rico lo ricibi e mihor cuido medico cu placa por cumpra. E preocupacion cu perdida di salud, cen y cuminda ta uno cu e pobernan ta sinta cune actualmente.
